Shillong, Rymphang 13
Ka Brazil kan yn lah ban bat biang ïa ka nam lahduh ha ka Olympic ka ban long ha Paris hadien ba kane ka kynhun ka la mad ïa ka jingshah rem da 1-0 kol ha ka Argentina.
Ha kane ka jingïakhun kaba kham kongsan kaba la long ha ka sngi U Blei na ka bynta ka South American Olympic (qualifier), u Luciano Gondou u la ïoh ban pynkhih jar na ka kynhun ïalehkai U-23 jong ka Argentina hapoh ka jingïalam u coach u Javier Mascherano. Une u rangïalehkai u la ïoh ïa katei kabu ksiar hadien ka jingïarap pynbuh bol da u Valentin Barco ha ka minit kaba 78 ha Brigido Iriarte Stadium kaba ha Caracas.
Lah ban pynkynmaw ka Brazil ka dei ka kynhun kaba la khur ïa ka takma ksiar ha ka jingïalehkai phutbol ki shynrang ha Rio de Janeiro bad ha ka Tokyo Olympics.
Na ka South America, la shah tang ar tylli ki kynhun ki ban ïoh rung sha ka Olympic ka ban long ha Paris ha u 2024. Te kumta kawei pat ka kynhun ka ban rai kan long hapdeng ka Paraguay bad ka Venezuela.
Ka Argentina ka la lah ban pyndep ïa ka thong jong kane ka jingïaknieh rung ha kaba ka la kamai 5 point na ki lai sien ïakhun na ka bynta ban bat ïa ka kyrdan ba hakhlieh.
Haba phai sha katei ka jingïakhun, ka Argentina ka la ïakhun tyngeh ha ka kylla step, hynrei kam shym la lah ban thep na ka daw ka jingïashan tyngeh ki rangïalehkai ‘dien ka Brazil. U Thiago Almada u la ïoh ban shut ïa ka bol ha ka minit kaba 16 hynrei ka la leit dei na diengkol.
U rangapkol ka Argentina u Leandro Brey u la lah ban pyllait na ka jingshah thep ha ka minit kaba 61 jong ka kylla miet hadien ba u rangïalehkai ka Brazil u Gabriel Pec u la ïoh ban shut najan. Ka Brazil kam shym la kynran dien ha kaba u rangïalehkai shakhmat u Endrick u la ïoh ban shut, hynrei u Gondou u la lah ban pynurlong na ka bynta ka Argentina hadien ba u la ioh ban pyndei ïa ka bol da ka khlieh.
“Ngi dei hok namar ngim shym la shah rem ha kane ka lympung ïaknieh,” la ong u Gondou, uba la thep saw kol ha kane ka lympung kaba la long ha Venezuela.
Lah ban pynkynmaw ka Argentina ka la khur ia ka takma ksiar ha ka jingialehkai jong ki shynrang ha ka Olympic kaba la long ha Athens ha u 2004 bad ha ka Beijing ha u 2008, hakaba u Lionel Messi u la ioh ban ialam ia ka kynhun ha Beijing.
