Shillong, Rymphang 13
Ha ka sien kaba nyngkong eh ki ‘thei ïalehkai jong ka South West Khasi Hills District ki la ïoh ïa ka lad ban pynpaw ïa ki sap ïalehkai ba kyrpang ha ka phutbol hadien ba ka Mawkyrwat District Sports Association (MDSA) ha ka sngi Ba-ar ka la sdang ïa ka Women’s League-2023-24.
Ïa kane ka lympung la plie pyrda da u General Secretary ka synjuk u Bah Pros Wanñiang ha ryngkat ka jingïadon lang ki dkhot ka Football Committee u Bah Khrawkupar Shangdiar, Secretary Football Committee, Bah Dawning, Secretary Ground Committee bad kiwei de ki dkhot ka MDSA bad ki riew rangbah na ki klob bapher bapher.
Ha kaba ïadei bad ka jingïalehkai jong kane ka sngi sdang, ka Jakrem SC ka la khur ïa ka jingjop hadien ba ka la lah ban pynliem noh ïa ka Marshillong SC da 6-0 kol.
