Itanagar, Rymphang:
Ka kynhun Special Investigation Cell (Vigilance) jong ki pulit ka Arunachal Pradesh ha ka lah sngi U Blei ki la kem ïa u heh sorkar halor ka jingshah kynnoh ba u la dawa bad bam tyngka na u riewpaidbah.
Ka jingkem, katkum ka jingïathuh jong ka kynhun SIC, la ong ba ka dei ka jubab halor ka jingmudui ba la buh da uwei u briew ïa uba la tip kyrteng kum u Nabam Tangu.
Ïa une uba la shah kynnoh la tip kyrteng kum u C K Singh (58) bad u la trei ïa ka kam kum u Junior Engineer ha PWD Chief Engineer’s (Western Zone) Office, ïa une la lap ba u dang kner ban shim ïa ka pisa kaba T. 50,000 na une u briew, kumba la pynshisha da u SIC (Vigilance) Superintendent of Police u Anand Mittal. Katkum ka jingmudui ba la phah da u Tangu, la ong ba une uba la shah kynnoh u la dawa pisa na ka bynta ban pynthymmai ïa ka License jong ka kompeni.
U Singh mynta u dang don ha kti jong ki pulit, la ong u SP Mittal, ha kaba u la bynrap shuh shuh da kaba ong ba ka jingpyntreikam ka la ïaid sted shakhmat khlem da pynslem hadien ba la ïohpdiang ïa ka jingujor.
Ïa ka jingmudui ejahar la buh hapoh ka jingtreikam jong ka Prevention of Corruption Act, bad ka jingtohkit ha kaba ïadei bad ka jingjia ka dang ïaid shakhmat, la ong u SP.
