New Delhi, Rymphang:
Ka sorkar Delhi ka la kyntait halor ka jingbthah jong ka sorkar kmie ban pynkylla ïa ka Bawana Stadium sha ka patok hashwa ka jingleit ïaid paidbah jong ki nongrep sha Delhi kaba la long hynnin ka sngi.
Kum ka jingpynphai nia halor ka jingtyrwa jong ka sorkar kmie, u Myntri ka tnat ki kam pohïing jong ka sorkar Delhi u Kailash Gehlot u la ong, “Ki jingdawa jong ki nongrep ki dei kiba shisha. Ka dei ka hok longbriew-manbriew jong ki nongshong shnong ka ri ba kin pynlong ïa ka jingïakhih ba jai-jai. Namar kata ka long kaba bakla ban kem ïa ki nong-rep…”
Kumba la sakhi, la ong ba ki nongrep khamtam kiba na Punjab, ha ryngkat ka jingsynran lang jong kiba na Haryana bad Uttar Pradesh, ki la sdang ïa ka jingïakhih jong ki ba la tip kum ka ‘Chalo Delhi’ ka jingïaid paidbah sha Delhi, hadien ba ka jingïakynduh jong ki bad ka sorkar kmie kam shym la lah ban pynurlong ïa ki jingdawa jong ki.
Hashwa ban pynlong ïa ka jingïaid paidbah, ki nongïalam jong ki nong-rep na Punjab, Haryana, bad Uttar Pradesh ki la dep ban ïakynduh ïa ki Myntri jong ka sorkar kmie kiba kynthup ïa u Piyush Goyal bad u Arjun Munda na ka bynta ka sien kaba ar jong ka jingïakren jong ki, ha kaba ka la neh da kumba san kynta, kaba long ka sngi kaba khatduh jong ka jingïakynduh ka sorkar kmie ban phah sangeh noh ïa kane ka jingïakhih ha kaba la khmih lynti ba kan sa wanrah ka jingdheng kali kaba jur ha kylleng ki bynta jong ka Delhi NCR ha kane ka sngi.
