Bengaluru, Rymphang:
U Myntri Rangbah jong ka Karnataka u Siddaramaiah hynnin ka sngi u la pynrem jur halor ka jingshahkem jong ki nongrep ka jylla Madhya Pradesh kiba la thmu ban leit sha ka nongbah Delhi na ka bynta ban pynlong ïa ka jingïakhih ban pyrshah ïa ka sorkar kmie.
“Ka jingkem ïa ki nongrep jong ka Hubballi da ka sorkar Madhya Pradesh, naba ki la thmu ban pynlong ïa ka jingïakhih ha Delhi, ka dei ka jingpynrem jur,” la ong u Siddaramaiah ha ka jingphah khubor ha ka rynsan X.
U Myntri Rangbah jong ka Karnataka u la dawa ruh ba ka sorkar Madhya Pradesh ka la dei ban pyllait noh mardor ïa kine ki nongrep kiba la shahkem bad ban ailad ïa ki ba kin pynlong ïa ka jingïakhih ha New Delhi.
“Nga la dawa ba ka sorkar Madhya Pradesh ka la dei ban pyllait noh mardor ïa baroh ki nong-rep na ka jylla jong ngi kiba la shahkem bad ban ailad ba kin ïashim bynta ha ka jingïakhih ha Jantar Mantar,” u la bynrap.
U la pynshisha shuh shuh da kaba ong ba ka dei ka sorkar Madhya Pradesh kaba la phah kem, ka la paw shai ba ki riewsniew ha lyndet kane ka kam ka dei ka sorkar kmie jong ka seng BJP hapoh ka jingïalam jong u Myntri Rangbahduh u Narendra Modi.
“Da kaba kem bad byrngem byrsit ïa ki, ka jingïakhun jong ki nongrep kam dei ban jah noh. Kane ka jingleh kan sa pynlong ïa kiba bun kiwei pat ki nongrep ba kin mih paidbah ha ki lynti syngkien, hynrei ka jingïakhun jong ki khun shynrang bad ki khun kynthei jong kane ka jylla kan ym jah noh. Lada ka sorkar kmie ka pyrkhat shisha ban pynïoh ka jingsuk jong ki nongrep bad ka shongsuk-shongsaiñ, ka la dei ban pynurlong noh halor ki jingdawa ba la buh bad ban ym sngap kuman bad ban leh donbor ha ka ban pynsngap jar ïa ki nong-rep,” u la bynrap.
