Kolkata, Rymphang:
Ka kynhun Enforcement Directorate (ED) ka la pynlong ïa ka jingleit khynra sha ki 6 tylli ki jaka kiba don ha Kolkata ha kaba ïadei bad ka jingdon jong ka kam bamsap kaba la mih na ka jingsam ïa ki jingbam Ration ha West Bengal.
Kine ki 6 tylli ki jjaka ki kynthup ïa ka IB Block, Baguihati, New Alipore, Metropolitan, Sec 5 ha Salt Lake bad Burrabazar.
Ka kynhun ED ka la pynlong ïa ka jingleit khynra ha ki jaka sah bad ki jaka treikam jong ki heh spah kiba kynthup ïa ka jong u Bakibur Rahman bad u Hanis Tosiwal ha Baiguihati; bad u Biswajit Das ha Salt Lake.
U Das, uba la ju don bynta ban khaïi ïa ki mar ki mata, u la paw ba u la ïajan bha bad u nongïalam jong ka seng Trinamool Congress u Shankar Adhya, uba la shahkem ha u bnai ba la lah halor ka jingdonkti jong u ha ka kam bamsap.
Kumba la ïathuh ka tyllong khubor, la ong ba ka kali jong u ruh ka la shah jurip bniah ha ki heh jong ka kynhun ED.
Ka kynhun tohkit ka dang bteng ha ka ban pynlong ïa ka jingtohkit khnang ban tip la ka la don ne em ka pisa kaba la kamai bymhok kaba la mih na kane ka kam bamsap ïa kaba la pyndonkam ha ka kam khaïi jong u.
Ka tyllong khubor ka la ïathuh shuh shuh ba u Tosiwal u la shah pynshisha ba u la pyrshang ban buhrieh ïa ka Mobile Phone jong u ha ka por ba ki heh jong ka kynhun ED ka la poi ha ka ïingsah jong u.
Hynrei ki heh jong ka kynhun ED ki la lap noh ïa ka phone jong u na ka ïing jong ki paramarjan.
Ha kaba ïadei bad kane, ka jaka treikam kaba ju kylliang pisa ka la shah khynra lang, kane ka don ha ka thaiñ Burrabazar.
Kane ka jingpyntreikam ka la long shi bnai tam hadien ba ki heh jong ka kynhun ED ki la shah thombor ha ki riewpaidbah ha Sandeshkhali katba ki dang pynlong ïa ka jingleit khynra ha kaba ïadei bad kane ka kam bamsap.
Ka kynhun kaba kynthup ïa ki heh jong ka kynhun tohkit bad ki shipai ïada, ki la shah thombor ha ka 5 tarik, Kyllalyngkot ha ka por ba ki dang thmu ban leit khynra ha ka ïingsah jong u nongïalam jong ka seng Trinamool Congress u Shah Jahan Sheikh.
Ka kynhun jong ki nongshong shnong kaba don da kumba 200 ngut, ka la thombor ïa ki kali kiba dei jong ki heh sorkar.
Kumba lai taïew hadien ba la jia ka jingshah thombor, ka kynhun ED ka la pynlong biang ïa ki jingleit khynra ha ki jaka treikam bad jaka sah jong u Sheikh, uba la paw ha ki khubor da ka jingkynnoh jong ka kynhun ki longkmie ha Sandeshkhali ba ma u bad ka kynhun ki runar ki la knieh jubor ïa ki jaka puta bad thombor pyrshah ïa ka longrynïeng jong ki.
Ka sorkar West Bengal ha ka lah sngi U Blei ka la thaw ïa ka kynhun jong 10 ngut ki dkhot ba la khlieh da ka DIG-Rank Woman Officer ba kan khmih bniah halor kane ka jingkynnoh.
