Guwahati, Rymphang:
Ka sorkar Assam ha ka lah sngi U Blei ka la ong ba ka la don jingthmu na ka bynta ban shna ïa 250 tylli ki ïing na ka bynta ka skhim Safai Karmacharis ha une u snem ha ka bynta kaba nyngkong bad nangne shakhmat kin sa bteng shuh shuh.
Ha ka por ba ka la ai jingkren ha ka por ba don ka dorbar mang tyngka, ka Myntri ka tnat pla tyngka jong ka Assam ka Ajanta Neog ka la ong, “Nga dap da ka jingsngemkmen kaba khraw ban pynbna halor ka skhim ban pynbiang ïing sha baroh kito kiba dei ban ïoh myntoi na ka Safai Karmacharis ha ryngkat ka jingpynbiang ïa ki Streetlight, ka jingpynpoi umbam -umdih bad ki Community Center ha ki Municipal Boards bad ki Town Committees ha kane ka bynta. Ha ka bynta kaba nyngkong jong ka jingpyntreikam, la mang da kumba T. 37.50 klur ka pisa halor ka jingthmu ban snna ïa kine ki 250 tylli ki ïing ha kylleng ka jylla ha une u snem ba mynta.”
“Ka jylla ka la thmu ban kynjoh kham shalor ha kaba ïadei bad ka jingwanrah ïa ka jingsuk, ka jingsynshar ba pura, ka jingkyntiew ha ka ban pynbiang ïa ki lynti-synkien, ki jingpyntreikam ban pynsuk ïa ki paidbah kynthup ka jingpynkupbor bad ka jingpynkhie-im ïa ka kolshor,” la ong ka Neog.
Ka Myntri ka tnat pla tyngka ka la ai ka jingïaroh ha kaba ïadei bad ki kam pynroi ba la ïohi ha ka jylla, “Ha ryngkat ka jingbuhthong jong ka jingkiew kyrdan ka jylla Assam hapdeng ki san tylli ki jylla ha ka ri, u Myntri Rangbah badonburom u la pynbna ba ngin sa nang bteng ha ka jingïaid lynti jong ngi na ka bynta ban wanrah ïa ki kam pynroi khnang ban lah ban pyntikna ba iwei pa iwei i nongshong shnong jong ka Assam in ïoh ïa ki jingkyrshan na ka jingtreikam ki skhim sorkar halor ki kam pynroi.”
