New York City, Rymphang:
Ki pulit ka nongbah New York ha ka Sngi Nyngkong ki la iathuh ba la don katto katne ngut kiba shah synreit kuli kiba khlad bad mynsaw ha katei ka jingjia kaba la jia ha ka jaka sangeh rel kaba don hapoh Bronx, ha kaba la iathuh ba ki don kumba 6 ngut kiba la ngat ha katei ka jingsynreit kuli.
Haba iadei bad kane, ki lad pathai khubor ka ABC TV ki la iathuh ba la ioh jingtip ba don tang uwei uba la khlad noh napdeng baroh kitei kiba mynsaw. Katba kitei ki 5 ngut pat ki dei kiba shu don ia ki jingmynsaw ki bym da ap jingma ia ka jingim jongki.
Ka nongrah ktien jong ka New York Police Department ka la iathuh ba tad haduh kane ka step Sngi Ba-ar ba la pyllait ia kane ka khubor, ki pulit ruh kim pat shym la ioh jingtip shai bad kumta kim pat lah ban pynshai ba katno ki don kiba shah siat bad kiba shah ktah ha katei ka jingjia.
Hynrei la ong ba kum kine ki jingjia ki long ki bym sngew pher shuh khamtam hapoh katei ka ri bad ha u snem 2022 ruh uwei u briew u la synreit kuli bad pynmynsaw ia 10 ngut ki briew kiba don ha ka jaka sangeh rel ha Brooklyn bad ka long ka jingjia synreit kuli naphang kaba nyngkong eh ha katei ka jaka sangeh rel, ka bym pat ju jia mynno- mynno ruh naduh ki snem 1984.
Tang hadien katto katne taiew pat, ha u Jymmang jong utei hi u snem 2022, sa uwei pat u briew u la siat ia u Daniel Enriquez 48 snem ka rta hapoh ka jaka sangeh rel hi.
