Dehradun, Rymphang:
Kum shi bynta ban lait na ki jingïakynduh jingeh ha kaba ïadei bad ka jingdon jong ki jingïakynad bad na ka jingpynjari da ka Curfew ha Banbhulpura, kaba ha Haldwani, la antad ba ki la don kumba 315 tylli ki longïing jong ki Muslim kiba la phet shnong noh na kane ka jaka ha kine ki khyndiat sngi ba la leit.
Na ka jingshah pynpra jong ka jaka mane blei bad ka Madrasa ha ka Haldwani Municipal Corporation kum ka jingpyntreikam ban pynpra ïa ki ïing ba la shna beaiñ, ha ka 8 tarik, Rymphang, ka la mih ka jingïakynad kaba jur, kaba la shim ruh ïa ka jingim jong san ngut ki riewpaidbah, ha kaba saw ngut na ki ki dei ki Muslims, ha kaba ïadei bad kane ki pulit ki la kem noh ïa kumba 140 ngut ki briew kiba la shah suba ba ki la donkti ha ka ban wanrah ïa ka jingïakynad kaba jur na ka bynta ban tohkit bniah ïa ki.
Kumba la ïathuh ka tyllong khubor la ong, “Kum shi bynta ban pynkhlaiñ ïa ki jingpyntreikam, ki bor pynïaid distrik ki la pynduh shwa ïa kumba 120 tylli ki License tiar siat ha kine ki thaiñ ba la jia ka jingïakynad.”
Kine ki tiar siat ki lah ban shah pyndonkam bakla khamtam ha kane ka por ba don ki jingïakynad.
Kumba la ïathuh ka tyllong khubor kaba la wan na ki pulit, la ong ba ha ka sngi Saitjaiñ, kiba bun ki birew na ka thaiñ Banbhoolpura ki la shah rah ha ki pulit na ka bynta ka jingtohkit.
Kumba la kynnoh, la ong ba ki pulit ki la don bynta ha ki kam thombor kum shi bynta ban khanglad ïa ki briew kiba ïakhih pyrshah halor ka jingpynpra ïa kitei ki ïing.
Na ka jingsheptieng ba ïoh nang bteng ka jingpynjari da ka Curfew bad ka jingpyrkhing jong ki pulit, ki longïing kiba dei jong ki Muslim ki la phet noh na kane ka thaiñ ha kine ki khyndiat sngi.
Ha ka step jong ka sngi U blei, kine ki longïing kumba la sakhi, la ong ba ki la ïaid lynti ha ryngkat ki tiar pyndonkam jong ki ha ka surok Bareilly.
Namar ka jingbym don kali, ki briew kim banse ba kin ïaid kjat ha ka jingjngai kaba 15 km ban poi sha Lal Kuan, ha kaba nangne ki la shong da ki rel ban leit sha kylleng ki jaka sor kiba don ha Uttar Pradesh.
Ki bor pynïaid distrik, ki la sam da kiba bun ki jingdonkam jong ki nongshong shnong kynthup, ki soh, ki jhur, ka dud bad ka Gas sha ka thaiñ kaba ngat ha ka jingshah pynjari da ka Curfew kata ha Banbhoolpura ha ka step jong ka lah sngi U Blei.
