Shillong, Rymphang 13
Ka synjuk ba pynïaid ïa ka jingïalehkai kriket ha India ka Board of Control for Cricket in India (BCCI) ka la pynmih ïa ka hukum na ka bynta ki nongïalehkai ki bym pat ïadon bynta ha ki lympung ïalehkai bar ri lane kiba danghap hapoh ka National Cricket Academy, ba ki dei ban ïalehkai ha ka Ranji Trophy.
Kane ka synjuk ïalehkai ka kwah ba ki ‘rang ïalehkai ki dei ban long kiba biang, ki bym shym la ïalehkai ha ki kyrdan ba la san (senior) ba ki dei ban ïalehkai ha ka Ranji Trophy na ka bynta ki jylla jong ki. Kane ka hukum jong katei ka synjuk ka la mih hadien ka jingïatai halor ki kynrum kynram kiba la wanmih paw shaphang u Ishan Kishan u bym shym la ïalehkai ha ka Ranji Trophy watla u long uba biang.
Naduh ba u la leit ïashim sha South Africa, kumjuh ka jingthait ka bor jabieng, u Ishan um shym la ïashim bynta ha kino kino ki jingïalehkai kriket. U kilanmet khatduh eh bad u kapten ka Mumbai Indians u Hardik Pandya ha Reliance Stadium.
Wat la hadien ka jingïoh jingbit na u coach ka kynhun ïalehkai ka ri u Rahul Dravid ban ïadon bynta ha ki katto katne ki jingïalehkai kriket, u Ishan u la ïalehkai ha la ka jong ka mon. Une u rangïalehkai u la kilanmet ha Baroda ha ka jaka ba un ïalehkai na ka bynta ka kynhun ïalehkai ka jylla jong u, ka Jharkhand ha ka Ranji Trophy. Kane ka jingleh ka jong u ka la long kum ka jingpynkheiñ ïa ki kyndon ba la buh da ka BCCI.
Hadien ka jingïoh hukum na ka BCCI, u Ishan u la khmih lynti mynta ban ïalehkai na ka bynta ka jylla jong u (Jharkhand) pyrshah ïa ka Rajasthan ka ban long ha Jamshedpur.
Kiwei pat ki rangïalehkai kum u Krunal Pandya bad u Deepak Chahar, ki bym shym la ïalehkai ha ka Ranji Trophy, ki la khmih lynti ban bud ïa kine ki kyndon. Kane ka kyndon kan long ruh ïa ki rangïalehkai ba la san (senior) kum u Shreyas Iyer, u bym shym la shah kynthup na ka bynta ki lai tylli ki jingïalehkai Tests pyrshah ïa ka England.
“Ki rangïalehkai kim ym lah ban shu pyrkhat tang na ka bynta ki lympung ïalehkai bar ri lane ha ka IPL. Ki hap ban ïadon bynta ha ki lympung ïalehkai hapoh ka ri bad ban long kiba trei shitom na ka bynta ki kynhun ïalehkai jong ki jylla jong ki,” la bynrap ka BCCI.
