Mairang, Rymphang 13
Ka Eastern West Khasi Hills District Cricket Association (EWKDCA) ka la pynkhreh mynta ban ïoh pynlong ïa ka lympung ïalehkai kriket ba la tip kum ka 2nd Eastern West Khasi Hills District T20 Cricket Tournament 2024.
Ha ka kyrwoh khubor ba la phah la ong ba na ka liang ka synjuk ka la pyntip ba ïa katei ka lympung la thmu ban sdang naduh ka 2 tarik u Lber. Ka khusnam ïa ka kynhun lahduh kan long T.28,000, katba ïa kaba wan ba-ar kan long T.14,000 tyngka bad ka bai rung kan long T.4,000 kawei ka kynhun.
La pyntip ruh ba nalor kitei ki khusnam ha katei ka lympung, kin don ruh ki khusnam ba kyrpang kynthup ïa ka Man of the Series, Man of the Match, Highest Run Scorer, Highest Wicket Taker bad kumjuh ruh ka Best Fielder.
Ka synjuk ka la pyntip ruh ba kino kino kiba kwah ban ïashim bynta ka tarik kaba khatduh ban pynpoi kan long ha lane shuwa ka 24 tarik mynta u bnai bad kane ka lympung kan long kyrpang tang na ka bynta kiba shong basah hapoh katei ka District. Nangta la pyntip ruh ba ïa ki jingtip ba kham bniah kin ïakynduh bad ki nongkitkam ka Synjuk.
