Shillong, Rymphang 13
U nongtied ba kynsai jong ka ri u KL Rahul un duh ïalehkai ha ka jingïalehkai Test kaba lai pyrshah ïa ka England ka ban long ha Rajkot.
Ka senior selection committee haba pynpaw ïa ki kyrteng jong u nongtied na Karnataka na ka bynta ka jingïalehkai Test kaba lai, ka la kynthup lang ïa une ‘rang ïalehkai. Ha ka sngi Saitjaiñ, haba pynbna ïa ka kynhun, ka kyrwoh lyngba ka BCCI ka la ong ba ka jingïashim bynta u Ravindra Jadeja bad u KL Rahul kan shong ha ka jinglah jong ki ha kaba kin hap ban ïoh ïa ka jingbit na ka kynhun ki nongsumar jong ka BCCI”.
Lah ban sngewthuh ba u Rahul um pat shym la long uba biang, hynrei la ailad ïa u Jadeja ba un mih madan ha ka jingïalehkai Test kaba lai hadien ba ka India bad ka England ki la ïakhaid mar 1-1. Na ka liang ka kynhun ki nongsumar ka la pynpaw ha ka kynhun ki nongjied ba dangdonkam ban khmih bniah shwa ïa u Rahul sa haduh shi taiew.
Kumba ka long mynta u Rahul u dangdon ha NCA bad un ym leit sha Rajkot. Na ka liang ka BCCI lem bad ka kynhun ki nongpynïaid ki la khmih lynti ba u Rahul un lah ban wanphai biang sha ka jingïalehkai kaba saw jong ka Test.
Kham hashwa u Rahul u la duh ïalehkai ha ka Test kaba ar kaba long ha Vizag hadien ba u la mynsaw ha ki bynta jong ka lbong kamon ha ka jingïalehkai Test kaba nyngkong kaba la long ha Hyderabad.
Ka jingduh ïa ki khlur ïalehkai ka la long ka jingktah kaba khraw ïa ka India hapoh ka jingïalam u Rohit Sharma kum u kapten. Kham hashwa u khlur ïalehkai ka ri u Virat Kohli, u la pyntip ba un hap ban duh ïalehkai namar ki daw shimet bad hadien sa u Shreyas Iyer.
Te kumta ha ka jaka u Rahul yn mih bujli ha ka jingïalehkai Test da uwei pat ki nongtied uba na Karnataka u Devdutt Padikkal. Ha ka jingïalehkai jong ka Ranji Trophy, u Paddikal u la lah ban tied haduh 151 run bad u shongknor jong ka kynhun ki nongjied u Ajit Agarkar u la ïoh ban sakhi ïa ka jingïalehkai jong ka Karnataka bad ka Tamil Nadu.
