Shillong, Rymphang 14
Ka Shillong Lajong FC ka la ïoh ïa ka jingjop kaba khatduh ha ka lympung ïalehkai U-17 Youth League ba la pynïaid da ka All India Football Federa-tion hadien ba pynliem ïa ka Aizawl FC da 4-1 kol ha ka Sngi Balang ha SSA Stadium, Polo.
Ha kane ka jingïalehkai u Ricky Kharkongor u la ïoh ban thep ar kol, katba ïa ki shi kol la thep da u Banlamkupar Rynjah bad u Riborlang Lyngdoh Lyngkhoi na ka bynta ban pynlong ïa kane ka kynhun hapoh ka jingïalam u Bah Seibor Sana (coach) ban kiew sha kyrdan ba-ar bad khur 14 point ha ka Group-C.
Ha kane ka jingïa-khun baroh ar ki kynhun ki la pyrshang ban ïakhun tyngeh naduh kaba sdang, hynrei dei ka Lajong kaba la ïoh ban pynkhih jar nyngkong eh ha ka minit kaba 28 lyng-ba u Banlamkupar Ryn-jah. Kane ka shi kol ka la ïai neh haduh kaba kut jong ka kylla step hadien ba ka Aizawl kam shym la lah ban pynphai.
Hadien katto katne por ba la bteng ïa ka jing-ïakhun jong ka kylla miet, ka Lajong ka la ïoh ban thep biang ïa ka kol kaba ar lyngba u Ricky Khar-kongor ha ka minit kaba 50. Une u rangïalehkai shakhmat u la pynbud biang ïa ka kol kaba ar ka jong u ha ka minit kaba 55 na ka bynta ban tam da lai kol.
Wat la ka Aizawl ka la shah thep haduh lai kol, pynban ka la lah ban pynphai kylla ha ka minit kaba 81 lyngba u Christopher Zaithant-luanga. Hashwa ban wai ka Lajong ka la ïoh ban thep biang sa shi kol lyngba u Riborlang Lyngdoh Lyngkhoi ha ka minit kaba 83 na ka bynta ban khur syndon ïa ka jingjop.
Kumba ka paw ka Lajong ka la lah ban pynliem teng ïa ka Aizawl ha ka wat kaba nyngkong. Wat la ka Football 4 Change Academy kaba na Manipur ka la shah rem da 2-1 kol ha ka NorthEast United FC, hynrei ka dangïai bat ïa ka kyrdan ba hakhlieh hadien ba ka la ïai sah 16 point.
Kumta ka NEUFC da kane ka jingjop ka la jam sha ka kyrdan balai bad kamai 12 point, katba ïa ka kyrdan ba khatduh la bat da ka Harisinga Town Club of Assam (3 point).
