Shillong, Rymphang 14
Ka Shillong Cricket Association (SCA) ka la sdang ïa ka lympung ïalehkai First Division Shillong Cricket League ha ka sngi Balang ha kaba ka Donkin CC ka la ïoh ïa ka jingjop hadien ba pynliem noh ïa ka Lumpyngngad da 13 run ha madan Polo.
Ha kane jingïalehkai ka Donkin ka la kam trai shwa ban tied nyngkong bad ka la kamai 104 run na bynta ban duh 10 wiket ha ki 24.4 over. U Vishal Konwar u la tied 24 run na ki 31 bol bad u Rohit Rai u la ioh 21 run na ki 32 bol. Katba u Vishal Kumar Balmiki u la khur 4 wiket bad ïa ki 2 wiket la khur da u Abhay Kumar Rai.
Haba wan beh ïa ka thong, ka Lumpangad ka la kamai tang 91 run hadien ba ka la shah pynhap 10 wiket ha ki 29.3 over. U Abhay Kumar Rai u la tied 19 run na ki 27 bol bad u Praveen Katty u la tied 18 run na ki 22 bol. Katba u Rohit Rai bad u MD Muksodel ki la khur mar 2 wiket. Ïa ka nam Man of the Match la khur da u Rohit Rai.
Ka jingïakhun ha ka sngi Palei kan long hapdeng ka Malki pyrshah ïa ka Matrisanga, kumjuh ha ka sngi Thohdieng kan long hapdeng ka Nongkseh United pyrshah ïa ka Masonic bad ha ka sngi Saitjaiñ kan long hapdeng ka Matrisanga pyrshah ïa ka Riatsamthiah.
