Guwahati, Rymphang:
U Myntri Rangbah jong ka Assam u Himanta Biswa Sarma hynnin ka sngi u la kynmaw tympang ïa ki martir kiba la ïap na ka jingshah thombor ha ki lehnoh kaba la jia ha Pulwama ha ka lyngkhuh snem kaba san. Kum ka jingkynmaw ïa kine ki riewshlur, u Sarma ha ka rynsan phah khubor ha ka X u la ong, ” Ha kum kane ka sngi ha u snem 2019, ki la don ki riewsniew na kylleng ki bynta jong ka khappud kiba la leh ïa ki kam pyntriem ha kane ka ri jong ngi ha kaba ki la don kumba 40 ngut ki shipai bashlur jong ngi ki la shah pynïap martir. Ha kum kane ka sngi, ngi kynmaw ïa kine ki shipai kiba shlur kiba la smai ban ai ka jingïada ïa ka ri bad ban pyllait ïa ka na ki jingma”.
U Myntri Rangbahduh u Narendra Modi ruh u la ai ka burom sha kine ki shipai kiba la shah pynïap ha ka jingshah thombor ha ki lehnoh ha Pulwama ha u snem 2019 naba kane ka jingjia ka la kynjoh sha ka san snem hynnin ka sngi. U Myntri Rangbahduh, ha ka jingphah khubor ha ka rynsan X, u la ong ba yn sa ïai kynmaw ïa ka jingaiti jong ki shipai ïala kajong ka jingim, “Nga pyndonburom ïa kine ki riewshlur kiba la pha ïala kajong ka jingim ha Pulwama. Ka jingshakri bad ka jinglehlade jong ki na ka bynta ka ri jong ngi kan sa ïai sah junom ha ki jingkynmaw”, la ong ka jingthoh.
