Itanagar, Rymphang:
Ki samla hapoh ka kynhun Youth Mission for Clean River (YMCR) da ka jingïatreilang ki la lah ban wanrah jingjop ha kaba ki la lah ban pynkhuid ïa ka wah Barapani naba ki la ïoh ban sei ïa palat 5000 kilogram ki jaboh.
Ha ryngkat ka jingïatreilang bad ka Itanagar Municipal Corporation Ward No-14, ka Takar Colony Youth Association, bad ka jingkyrshan jong ka Itanagar Smart City Corporation Limited, la sakhi ba ka la don ka jingpynkhuid ïa kane ka wah ha kaba la ïashim bynta da kiba bun ki nongïarap kiba la palat ïa ki 60 ngut ki nongïarap.
Ha ka por ba la don ka jingpynkhuid, la lah ban sei ïa ki plastik bad ki jingpyndonkam napoh ïing briew ki bym pyndonkam shuh ha kaba kane ka la pynkhuid shisha ïa ka wah. Kane ka jingpynkhuid ka la long ha ka taïew ba la lah ha kaba ka jingpynkhuid jong kine ki kynhun ym tang ïa kane ka wah, hynrei ïa ki nala kiba don ha marjan jong kane ka wah.
U IMC Mayor u Tamme Phassang, ha ka jingai jingkren ha ka prokram ba la pynlong, u la ban jur da kaba ong ba ka la dei ban don ka jinghikai dalade ïalade bad ka kynhun ban ïatreilang hapdeng ki nongshong shnong ban wanrah ïa ka jingkhuid ïa ka wah bad ki sawdong-sawkun.
U Phassang u la kdew shai da kaba ong ba ki jaboh ba don ha ka wah Barapani la lap ba la bret da ki briew kiba don ha ka thaiñ Naharlagun, naba kim don ka jingkitkhlieh naba ki la bret ïa ki jaboh bad ki tiar bym pyndonkam shuh haba ki ïaid lynti lyngba ka jingkieng. U la pynrem jur halor kane ka jingleh jong kine ki briew bad u la kyntu ïa ki ba ki la dei ban bud ïa ki kyndon ba la buh ha kaba ïadei bad ka rukom bret ïa ki jaboh bad ba kim dei ban bret ïa ki sha ki nala ne sha ka wah lada ki trok kit ñiut kim treikam.
