New Delhi, Rymphang:
Ka Sonia Gandhi hynnin ka sngi kata ka sngi Balang ka la pynrung kyrteng ïalade na ka bynta ban ïakhun ïa ka ilekshon Rajya Sabha ka ban sa wan na Rajasthan. Kham hashwa jong kane ka sngi ka la leit ban ïuhkjat ha Kad Liengsuiñ Jaipur ha ryngkat ka jingsynranlang u khun jong ka u Rahul Gandhi lem bad ka khun ka Priyanka Gandhi Vadra. Ka la shah pdiang burom ha ki heh nongïalam bad u Myntri Rangbah barim jong ka jylla u Ashok Gehlot lem ryngkat kiwei pat.
Ha kaba ïadei bad kane ka bynta, ka seng Congress ka la dep ban pyllait ïa ka thup kyrteng jong ki kyrtong ki ban ïakhun ïa ka ilekshon Rajya Sabha, ha kaba la pynrung kyrteng ïa ka Sonia Gandhi ban ïakhun ha Rajasthan.
U Akhilesh Prasad Singh uba na ka seng Congress u la shah pynrung kyrteng na ka bynta ban ïakhun ilekshon ha Bihar, u Abhishek Manu Singhvi ha Himachal Pradesh, bad u Chandrakant Handore u la shah pynrung kyrteng ban ïakhun ha Maharashtra.
Ka seng ka la don jingkyrmen ban ïoh ïa ka jingjop ha kawei ka Rajya Sabha konstitwensi na ka jylla, bad kan sa long ka sien kaba nyngkong ban don ïa ka nongïalam ba la 77 snem ka rta ha ka Upper House hadien ba la shakri san sien kum ka MP ha Lok Sabha MP.
Ka Sonia Gandhi, kaba la mihkhmat na Rae Bareli ha Lok Sabha, kan ym ïakhun ïa ka General Elections ka ban sa wan. Ka la shahjied nyngkong kum ka dkhot jong ka Parliament ha u snem 1999 hadien ba ka la dep ban shimti ïa ka kam kum ka President jong ka seng Congress.
Kum ban shu kdew ki la don baroh kumba 56 ngut ki dkhot jong ka Rajya Sabha na ki 15 tylli ki jylla kiba la shongthait ha u Ïaïong bad ka ilekshon sha kine ki konstitwensi kan sa long ha ka 27 tarik, Rymphang.
Ka tarik bakhatduh ban pynrung kyrteng kan sa long haduh mynta ka sngi ka 15 tarik, Rymphang.
