Ka jingpynkhreh ban thep kam na ka bynta ki 3,000 tylli ki kam kiba lait ha ka tnat pulit naduh ka kyrdan Sub-Inspector sharum ka la nang ïaid. Ka tnat pulit ka la kular ban pynlong ïa ka jingpynrung kam ka bakhuid bad kaba lait na ki jingthoh bria. Ïa kane, ngim pat lah ban batai lypa mynta namar ka jingpynrung kam kan dang long bad ka por hi kan sa batai ïa kiei-kiei. Kane ka tnat ka khmih lynti ba na ka bynta kitei ki 3,000 tylli ki kam kiba lait, ki nongthep kam kin don kumba 3 lak ngut eiei. Kane ka pyni ïa ka jingkyrduh kam kyrduh jam bad dei sa tang kane ka tnat kaba lah ban ai kam ïa kiba bun ngut haba ïanujor bad kiwei pat ki tnat sorkar.
Ka tnat pulit ka don ïa ki hynriew tylli ki Battalion, ha kaba saw tylli ki dei kita ki IRBN lane Indian Reserve Battalion, nalor ki pulit ha ki distrik bad ki pulit SF-10. Ha ka shi Battalion, ki dei ban don kumba 1,000 ngut eiei ki pulit. Namarkata, ka tnat pulit ka donkam briew bha ban pyndap ïa ki jaka kiba lait na ka daw jong ka jinghap ban shongthait noh jong kito kiba la kot ïa ka 58 snem ka rta. Ha ka shi snem, lehse da ki spah ngut ki shongthait na ka kam pulit tangba bunsien ngi ïohi ba ïa ka jingpynrung kam la leh tang shisien ha ki katto katne snem bad ym man la u snem.
Kane ka tnat bad ki briew kiba trei ki long kiba bunkam khamtam kito kiba don bynta ha ki kam tohkit. Man la ka sngi ki ju mih ki jingjia bapher-bapher bad ka dei ka kamram jong ki pulit ban tohkit, kem bad ïakhun ha ïingbishar khnang ba kito kiba leh ïa ki kam bymman kin ïoh ïa ka jingpynsaja katkum ki kyndon aiñ. Ki pulit kiba nep ka jabieng bad kiba lah ban pynbiang ïa ki sabut, ki ju ïoh ïa ka lad ban ïohi ïa ka jingshah pynsaja jong kito ki nongleh ïa ki kam bymman ha ka ïingbishar.
Ha kane ka pyrthei kyrduh kam kyrduh jam, dei sa tang ka tnat pulit kaba dang lah ban ai jingkyrmen ïa ki samla namar ka jingkham don ki kam kiba lait haba ïanujor bad kiwei pat ki tnat treikam jong ka sorkar. Ngi ïohi ïa ki samla kiba la don wat ïa ki kyrdan kiba kham heh ki ban thep ïa ki kam kiba kham rit. Ki kmie ki kpa jong ki, ki la pynlut da ki phew lak tyngka ban phah pule naduh na skul haduh ha skulbah. Tangba bunsien ka jingtrei shitom jong ki kmie ki kpa bad ki khun jong ki, ki shu long lehnohei namar ka jingbym ïoh kam ïoh jam. Nalor ka jingkyrduh ki kam sorkar, hangne ha jylla jong ngi ngim don ki kompani kiba lah ban ai kam kham bun. Kito kiba nang ban wad lad wad lynti, ki ju leit noh shabar jong ka jylla ne ka Ri ban trei ban ktah. Ka jingbym banse ka pynlong ïa ki ban iehnoh ïa la ka jong ka ïing ka sem ban leit wad ïa u khaw u kba sha kiwei pat ki jylla ne wat sha shiliang duriaw.
Wat hapdeng ka jingpynbna jong ka sorkar ba kin lait 3,000 tylli ki kam pulit, kane kam pat biang ban pynthikna ba kham bun na ki samla kiba la biang ka rta kin ïoh kam ïoh jam lut. Da ki phew hajar ki samla ki pyndep ïa ka B.A./B.Sc./B.Com. bad kiwei ki jingpule nalor ki kyrdan kiba kham heh ha ka shi snem. Ki leit na kawei ka shlem treikam sha kawei pat ban ai ïa ki kot ki sla da ka jingkyrmen ba kin ïoh kam ïoh jam. Hynrei kiba bun ki hap ban leit phai da ka jingsngewsih namar ka jingbym don ki kam. Lada don ruh, bun kim lah ban ïakhun namar la don lypa ki briew jong-no re jong-no. Ka jingdonkam ban pynïadei bad ki Myntri Sorkar ne ki MLA ne ki IAS/IPS ban ïoh kam ïoh jam wat haba la biang lut nadong shadong ka pynduh mynsiem ïa ki samla. Balei hap ban da ithuh ïa kita ki heh ki haiñ lada nalade la biang lut ki jingdonkam ban ïoh ïa ka kam? Kaba kum kane ka dei ban duh ban dam noh syndon tangba kan ym duh bad kan ïai bteng.
Watla katta ruh, ngi kyrmen ba ka tnat pulit kan leh ïa kaba donkam ban pynthikna ba ka jingpynrung kam ha kane ka kynti kan long kaba ïaid beit ïaid ryntih katkum ki kyndon bad kiba dei hok shisha ban ïoh kam, ki dei ban ïoh bad ki bym dei hok, kin hap ban shah kyntait beit sharud. Ka jingkhuid jingsuba ha ka synshar ka khadar ka dei ban paw lyngba ka jingpynrung kam. Lada kam long ka bakhuid, kam myntoi ban ïakren nalor ki rynsan ba ka sorkar ka kwah ïa ka jingsynshar kaba beit.
