Rawalpindi, Rymphang:
Katkum ki khubor, la ong ba u dkhot Member of Parliamentary Affairs (MPA) jong ka seng Pakistan Tehreek-e-Insaf (PTI), u Chaudhry Muhammad Adnan, u la shah siat iap ha ki runar bym don jingithuh hapoh jong ka nongbah Rawalpindi, la iathuh ki pulit ka Rawalpindi ha ka Sngi Nyngkong.
Katkum ka kaiphod ba la ioh lum, la ong ba utei u kyrtong u dei uba iakhun ia ka ilekshon na ka konstitwensi NA-57 bad PP-19 jong ka Rawalpindi kum u kyrtong shimet lane u ‘Independent Candidate’.
Katkum ka jingiathuh jong ki pulit ka Rawalpindi, la ong ba kane ka la jia hakhmat ka ophis treikam jong u City Police Officer (CPO) kaba don ha ki bynta jong ka Civil Lines.
Kumta la ong ba u CPO ka Rawalpindi, u Syed Khalid Hamdani u la bthah ia ki SP ka Potohar ban bud dien bad kem ia baroh kito kiba ïadon kti bad kiba iasuh buit lang ha katei ka kam thombor bad kam pyniap.
La ong ba ki heh pulit ki la leit poi sha katei ka jaka tang mar ia ioh jingtip halor katei ka jingjia ha katei hi ka meit bad la ong ruh ba katei ka tnat pulit ka la thaw da kawei ka kynhun ba kyrpang ban thwet bad bud-dien ia kitei kiba don kti baroh.
La ong ba u Adnan u long u khun jong u Chaudhary Muhammad Jan bad la kha ia u ha ka 15 tarik u Rymphang ha u snem 1976 hapoh Rawalpindi hi.
U la pyndep ia ka jingpule ha ka kyrdan ‘Graduate’ na ka Punjab University bad u la shah jied ban rung sha ka iing dorbar thaw aiñ ka Pakistan ha u snem 2018. Naduh katei ka por la ong ba u ju bat ia ka kam kum mu Secretary jong ka tnat Social Welfare.
U Adnan u long ruh u Secretary jong ka tnat pla tyngka ka Pakistan naduh u snem 2018 haduh 2020.
