Shillong, Rymphang 14
Ka BCCI ka dang ïai ap ïa ki tarik na ka bynta ka ilekshon Lok Sabha khnang ba kan pynthikna ban pynlong ïa ka lympung ïalehkai Indian Premier League IPL 2024 lano ban sdang pat ïa ka mynta ka aïom.
U Chairman ka IPL u Arun Dhumal u la pynthikna ba ïa ka IPL 2024 yn ym pynkynriah napoh ri India. Wat la ka ilekshon jong ka Lok Sabha 2024 ka lah ban ïatyngkhuh bad ka IPL, hynrei ka la don ki khubor kiba la pynpaw ba ïa ki katto katne ki jingïalehkai lah ban pynlong shabar jong ka ri India. Hynrei na ka liang ka BCCI ka la pynthikna ba kan pynlong ïa baroh ki jingïalehkai hapoh ri India. Te kumta ïa mynta kane ka synjuk ïalehkai ka dangïai ap ïa ka tarik na ka bynta katei ka ilekshon khnang ba kan lah ban pynthikna ïa ki tarik na ka bynta ka IPL 2024.
“Ngin ïatrei lang bad ka Sorkar India, khnang ban pynthikna ban pynlong ïa ka lympung ïalehkai hapoh ri India. Ngi dangïai ap khmih lynti ban tip ïa ka tarik na ka bynta ka ilekshon MP bad hadien ngin sa lah ban pyrkhat janai na ka bynta ka lympung ïalehkai,” la ong u Arun Dhumal.
Ha ka jingshisha ïa ka IPL 2024 la khmih lynti ban sdang naduh 22 tarik u Lber, hynrei na liang u Arun Dhumal u la kyntait halor kane ka jingpynbna ïa ka tarik ïalehkai.
“Ka lah ban sdang naduh kaba kut jong u Lber bad ka ilekshon MP kan long ha u Ïaïong, hynrei ngin hap ban ïatrei lang bad ka Sorkar India halor kane ka bynta,” la bynrap u Dhumal.
Ka daw ba ka BCCI ka dangïai ap ïa ka jingpynbna na ka Election Commission of India na ka bynta ka tarik namar ka donkam ïa ki bor pahara.
Ki bor pahara jong ki pulit ki ju ai jingïada ha ka por ba pynlng ïa ki jingïalehkai IPL ha ki stadium. Hynrei ïa mynta ki dangïa bunkam na ka bynta ka ilekshon bad kin ym lah ban ïadon bynta na ka bynta ka IPL. Te kumta ka BCCI ka donkam ban pyrkhat janai namar ym lah ban pynlong ïa ka IPL kat bym pat lah ban pynlong ïa ka ilekshon.
Ka jingeh ka long ba ka India ka don haduh phra bynta ïa ka ilekshon, te kumta kan long kaba eh ban ïathuh lypa na ka bynta ka lympung ïalehkai IPL.
