Shillong, Rymphang 15
Ka Shillong Lajong FC kan pynkhreh ban ïakhun pyrshah ïa ka Neroca FC ha ka lympung ïalehkai I-League ha ka sngi U Blei ha kane ka nongbah.
Ha ka jingshisha ïa kane ka jingïakhun la dei ban pynlong ha Imphal, hynrei na ka daw ka jingbym shong shngaiñ ha Manipur la hap ban kynriah noh ïa ki jingïalehkai kiba dangsah ha la ïing (home matches) jong ka Neroca sha kane ka nongbah.
Kham hashwa ka Shillong Lajong ka la mad ïa ka jingshah rem ha ka Gokulam Kerala da 2-0 kol.
Kumta ka Lajong ka la hiar sha ka kyrdan ba hynriew bad kamai 19 point na ki 13 sien ïakhun, katba ka Gokulam Kerala ka la jam sha ka kyrdan balai bad kamai 23 point. Ka Neroca ka la don ha ka kyrdan ba-ar na shatrai bad kamai 7 point na ki khadar sien ïakhun.
