Shillong, Rymphang 15
Shi bynta ban rakhe ïa u mawmer jong ka jingdap 10 snem ka jingïaid lynti jong ka seng Hynñiewtrep Youth Council (HYC), ka Sports Cell kan pynlong ïa ka lympung ïalehkai phutbol ki khynnah ba la tip kum ka Under-16 Football league 2024 naduh 30 tarik u Lber 2024 ha madan Malki, Shillong.
“Ha kane ka lympung la shah tang 32 tylli ki kynhun ba kin ïoh ïashim bynta bad ka tarik kaba khatduh ban pdiang kan long ha ka 16 tarik u Lber. Ka khusnam ha kane ka lympung kan long T,60, 000 na ka bynta ka kynhun kaba rah nam lahduh lem bad T.30,000 ïa kaba wan ba ar ryngkat ki trophy. Ka seng ka la pynkhreh ruh ïa ki khusnam shimet na ka bynta ki rangïalehkai kiba kynsai,” la pynpaw u Sports Secretary u Bah R.C Thangkhiew haba ïakren bad ki nongthoh khubor ha ka sngi Palei.
“Ki khynnah ki ban ïoh ïashim bynta ha kane ka lympung ki dei ban long kiba la kha ha u 2008, 2009, 2010 ter ter. Ki khynnah ki dei ban pynbiang ïa ki kot ki sla ki ban pynshisha ia ka snem kha kum ka syrnod sngi kha bad ka Aadhaar.”
“Ngin pyrshang ban pynkut noh ha ka 13 tarik u Naitung hashwa ba ngin jam ïa u mawmer jong ka jingïaid lynti ka seng HYC kaba shiphew snem.
Ha kawei pat ka liang u Chairman ka Sports Cell u Bah Frankie Thangkhiew u la ong ba ka seng kan kham pyr-khing ha kaba dei bad ka rta jong ki khynnah. “Ngin pyntreikam ïa ka Bone Test lyngba ka MRI khnang ba ngin lap ïa kiba shukor ïa ka rta kaba shisha ka jong ki.”
