Shillong, Rymphang 15
Ka Khun Hynñiewtrep National Awakening Movement (KHNAM) ha ka Sngi Palei ka la dawa na ka Sorkar Jylla ba ka dei ban pynduh noh ïa ka ‘Personal Interview’ ha kaba ïadei bad ka jingpynrung kam ha ka Group-B, Group-C bad Group-D ha ki tnat treikam bapher bapher jong ka Sorkar Jylla.
Ka KHNAM ka la dawa ïa kane ha ka Sngi Palei hadien ba ka la pynlong da ka jingshong kyllaiñ mungor hakhmat jong u Mot Sahnam u Kiang Nangbah hajan Civil Hospital Shillong. Ki nongïalam ka seng ki la pynlong ruh da ka jingteh banner kum ka dak ban pynsngew ïa kane ka jingdawa sha ki tyndong shkor jong ka Sorkar MDA-2.
Ïa kane ka jingïakhih la lamkhmat da u Working President ka KHNAM Bah Thomas Passah bad u General Secretary Bah James MA Neng ha kaba la wan ban ïashimbynta ruh da ki dkhot ka seng.
Na ka liang u Working President ka Khun Hynñiewtrep National Awakening Movement (KHNAM) Bah Thomas Passah, u la ong ba ka jingpynlong ïa ka Personal Interview ha ka thungkam Sorkar ka dei kata ka lad ban thep kam sop-sop da ki briew kiba don ha ka bor bad ka dei ka lad ban khrong pisa na ki paidbah ban aikam.
U Bah Passah u la ong, “Kumba ka long mynta hi ka shai kdar ba ka Personal Interview ka dei ka lad ban ïoh thep kam tuh ïa ki briew kiba ithuh ïano-re-ïano kiba don ha ka bor bad ka lad ban pan pisa na ki paidbah ban aikam. Kan shong ha ka sorkar bad ha ki 60 ngut ki MLA ka jylla ba lada kim don bynta ban leh politik ïa ka jingïoh kam jong ki samla ki dei ban kren ïa kane ka bynta bad lada ki sngap jar ka mut ba ki ruh ki don bynta ha ka ban leh politik ha ka kam thungkam thungjam.”
Nalor kane, u la ong ka KHNAM ka la dawa ba dei ban pynduh pyndam noh ïa ka Personal Interview kumba la leh da ka Sorkar India ha ka kyrdan Group B,C bad D kaba dei na ka bynta ka kam Cleaner, Sweeper, Lower Division Clerk, Driver bad kiwei kiwei.
U Bah Passah u la ong ba la shi snem mynta ka seng ka la phah ïa ka jingthoh sha ka Sorkar ban kyrpad ba ka dei ban pynduh noh ïa ka ‘Personal Interview’ kaba pynlong ïa ka jingthungkam na ka bynta ki kam ha ka Group-B, Group-C bad Group-D ha ki tnat treikam bapher bapher jong ka sorkar jylla hynrei ka Sorkar kam shym la sngap satia ïa kane ka jingdawa jong ka seng.
Nalor nangta, u la ong ruh ba ka Sorkar India naduh u snem 2016 ka la dep ban pynduh ïa ka ‘Personal Interview’ ha ki 23 tylli ki jylla ka ri India hynrei kaba lyngngoh ka long ba ka Sorkar Meghalaya kam pat lah satia ban bud ïa kane ka nuksa ba la leh da ka Sorkar India.
Haba pynksan ïa kane ka jingdawa, u Bah Passah u la ong ba ka jingdawa jong ka seng ban pynduh noh ïa ka ‘Personal Interview’ ka long ban wanrah ïa ka rukom thungkam thungjam kaba khuid bad suba bad ka bym don jingïashah liang ha kaba ki nongthep kam kim dei satia ban wad jingïarap na ki nongmihkhmat ban ïoh ïa ka kam kaba ki la thep.
