New Delhi, Rymphang:
Ka CWRC (Cauvery Water Regulation Committee) ka la kyntait ïa ka jingdawa jong ka Tamil Nadu ban hukum ïa ka sorkar Karnataka ba kan pyllait da 7.6 tmcft ka um sha ka jylla.
Ka Committee ka la hukum ïa ka Karnataka na ka bynta ban pyntikna ha ka ban pyllait ïa ka um katkum ka hukum jong ka Cauvery Water Disputes Tribunal (CWDT) ba la khmih bniah da ka Supreme Court.
Katkum ka jingbhah jong ka CWDT, la ong ba ka Karnataka ka la dei ban pyntikna na ka bynta ban pyntuid ïa ka um na ka wah ha Biligundulu sha ka bynta khappud da kaba pyllait da 1,000 cusecs shi sngi (2.5 tmcft) na ka bynta baroh shi bnai jong u Rymphang haduh u Jymmang.
Na ka bynta kane, ka Karnataka kam donkam ban pyllait ïa ka um na KRS, Kabini, Harini bad Hemvathy.
Ki saw tylli ki Dam kiba heh jong ka Karnataka kiba don da kumba 37tmcft ka um.
Ha ka jingïalang kaba 93 jong ka CWRC kaba la pynlong hapoh ka jingpynïaid jong u Vineet Gupta, ka Commission ka la ïathuh ïa ka Tamil Nadu ba kam donkam ban pyllait shuh ïa ka um na ka wah na ka bynta ka jingsam um.
“Ki jingthung ki la ih bad man sa tang ban kheit ha Tamil Nadu bad kam da donkam shuh ban ai um shuh,” la ong u Gupta ha ki nongthoh khubor.
Ki heh sorkar jong ka Tamil Nadu, ha kaba ïadei bad kane, ki la ong ba ki jingthung kiba dei thung dier por ki dang donkam ïa ka um.
Ka jingsam um sha Tamil Nadu ka la kut ha ka 31 tarik, Kyllalyngkot bad ki jingtung jingtep ki la ieh bad la dei ban kheit ne ot, la ïathuh ka tyllong khubor.
