Shillong, Rymphang 15
U Ishan Kishan u lah ban shah pynkut noh ka kontrak ha ka BCCI hadien ba u la paw biang ki khubor ha kine ki shibnai naduh ba u la sangeh ïalehkai shipor na ka jingleit ïalehkai ka India sha South Africa.
Ha ka jingshisha ka BCCI ka la kyrshan ïa u ban sangeh ïalehkai shipor, hynrei ki khubor kiba la mih ki la pynpaw ba ka jingduna u Ishan Kishan ban ïalehkai ka la mih ki jingkylli shaphang jong u.
Wat la na ka liang u coach ka kynhun ïalehkai kriekt ka ri u Rahul Dravid u la ong ba u Ishan Kishan u donkam ban ïalehkai ha ki katto katne ki jingïalehkai kriket khnang ba u lah ban wanphai biang sha ka kynhun ïalehkai ka ri, hynrei u Ishan Kishan u la jah jar na kino kino ki lympung ïalehkai.
Kumba ka Ranji Trophy ka dangïaid shakhmat, pynban u Ishan um shym la ïashim bynta ha kane ka lympung ïalehkai bad u la pynleit jingmut ha ka ban kilanmet ïalade marwei. Dei halor kane ka nongrim ba ka lawei u Ishan ka lah ban ktah ïa u ha ka kam ïalehkai kriket jong ka ri.
Kat kum ki khubor la ong ba u Kishan Kishan u dangdon hapdeng ka kontrak (grade C) ha kaba ka jingïoh ka jong u ha ka shi snem ka long haduh T. 1 klur tyngka, hynrei na ka liang ka BCCI ka lah ban pynkut noh ïa ka kontrak jong u ha kano kano ka por, hynrei ïa mynta ym pat shim kano kano ka rai.
Kumba ka ICC T20 World Cup ka ban long ha America kan sdang naduh 1 tarik u Jylliew bad ka jingïalehkai jong ka India kan sdang ha ka 5 tarik u Jylliew ha New York, hynrei ki rangïalehkai kin bunkam na ka bynta ïa ka IPL, kaba la thmu ban sdang naduh 22 tarik u Lber haduh 26 tarik u Jymmang.
Hynrei la sngewthuh ba baroh ki rangïalehkai jong ka ri kin ïoh ka jingbthah ba kin hap ban long kiba la khreh na ka bynta ka IPL kaba long ka lympung ialehkai kaba heh ha ka jingsiew.
“Ki rangïalehkai kin ïoh ïa ka jingsiew kaba heh bad kin ym lah ban jied na ka bynta kitei ki kynhun ïalehkai. Hynrei ki hap ban pynleit jingmut na ka bynta ka kontrak kaba ki la ïateh bad ka synjuk ïalehkai jong ka BCCI,” la ong ki khubor.
