Shillong, Rymphang 15
Ka jingbym ïadon lang ki khlur ïalehkai ‘double’ kata u Satwiksairaj Rankireddy bad u Chirag Shetty ka la pynlong ïa ka kynhun ïalehkai ka ri ban shah rem noh da 2-3 ha ka China ha ka Badminton Asia Team Championships kaba la long ha ka sngi Palei ha Malaysia.
Katba ki khlur ïalehkai kiba kynthup ïa u HS Prannoy bad u Lakshya Sen ban khur jingjop ha ka jingïakhun para marwei, hynrei ka China ka la ïakhun tyngeh na ka bynta ban khur jingjop ha ki ar tylli ki jingïalehkai ‘doubles’ na ka bynta ban ïakhaid mar 2-2. U rangïalehkai uba la khur ïa ka nam lahduh hapoh ka ri u Chirag Sen u la shah rem noh da 15-21 16-21 ha u Wang Zheng Xing ha ka jingïalehkai kaba san ha kaba ka India ka dangdon hapdeng ka jingïakhaid.
Watla ka la jam sha ka quarter final, ka India ka la don ha ka kyrdan ba-ar ha ka jingïalehkai group, bad ka China ka la bat ïa ka kyrdan ba hakhlieh.
Lah ban sngewthuh ba u Satwik bad u Chirag ki la shah pynshong noh ha ki bor pynïaid jong ka kynhun ha kaba ka India ka la jam sha ka quarter final hadien ba la la jop da 1-4 ia ka Hong Kong ha ka sngi Balang.
U rangïalehkai ba bat ha ka kyrdan ba hynñiew u Prannoy u la khur ïa ka jingjop da 6-21 21-18 21-19 ïa u rangïalehkai ba bat ha ka kyrdan ba 16 ha ka pyrthei, u Weng Hong Yang na ka bynta ban pynlong ïa ka India ban tam da 1-0.
Ha ka jingïalehkai doubles, u MR Arjun bad u Dhruv Kapila ki la shah rem 15-21 21-19 19-21 ha u Chen Bo Yang bad u Liu Yiin. Katba u lahduh jong ka Commonwealth Games u Lakshya Sen u la lah ban pynliem noh ïa u Lei Lan Xi da 21-11 21-16 ha ki 40 minit, hynrei u Suraj Goala bad u Pruthvi Krishna-murthy Roy ki la shah rem noh da 13-21 9-21 ha u Ren Xiang Yu bad u Xie Hao Nan ha ka jingïalehkai doubles kaba ar na ka bynta ban ïakhaid mar 2-2.
Haba phai sha ka kynhun ki ‘thei ïalehkai jong ka ri India ki la lah ban pynliem noh ïa ka China da 3-2 na ka bynta ban jam sha ka kyrdan ba hakhlieh ha ka sngi Ba-ar.
