Shillong, Rymphang 15
Ka tnat Sport and Youth Affairs jong ka Sorkar Jylla ha ryngkat ka jingïasnoh kti lang ka North Eastern Hills University Shillong bad ka Sport Authority of India, ha ka sngi Palei ka la pynlong ïa ka jingïakob mareh kaba 6.5 kilometre na ka bynta ban pynshai paidbah ha kaba ïadei bad ka Khelo India University Games 2024 ha kaba ka Meghalaya kan ïoh ban pynlong ïa ka jingïalehkai siatkhnam ha SAI Training Centre, Shillong.
Ïa kane ka jingïakob mareh la kaweh lama da u Colonel Omkar Singh (retd) Registrar jong ka North Eastern Hills University ryngkat u Bah John F. Kharshiiing, Working President ka Meghalaya State Olympic Association, u Prof. L Kma bad kiwei kiwei.
Ha kane ka jingïakob la wan ïashim bynta da 280 ngut ki nongmareh shynrang bad kynthei kiba la shim bynta ha ka ‘open category’ bad ha kiba la 50 snem shaneng. Ha ka 6.5 Km (open category) jong ki shynrang, u Dabit Dkhar u la khur ïa ka jingjop, ïa ka kyrdan ba-ar la ïoh da u Kangujam Bikram Meitei bad balai u Rishanmehi Ryngkhlem. Katba ha ka liang ki kynthei la khur jingjop da ka Marqueenless Ramsiej, ba-ar ka Sarojani bad balai ka Bandasharai Marweiñ. Ha ka open category jong kiba la 50 snem shaneng, u Bah Badon Singh Tham bad ka Kong Ibameri Shulllai ki la khur ïa ka jingjop.
Haba pynpaw ha kane ka sngi, u Colonel Omkar Singh (retd) Registrar jong ka North Eastern Hills University u la pynpaw ba kane ka long shi bynta ban kyntiew ïa ki nongïalehkai ba kin paw haduh ki lympung ïalehkai shabar ri. U la ong ruh ba ka sorkar ka thmu ban saiñ dur ïa ki sap ïalehkai jong ki samla ha ki lympung ïalehkai kiba heh khnang ba ki lah ban wanrah nam bad burom ïa ka jylla bad ia ka ri hi baroh kawei.
Ïa kane ka Khelo India Univer-sity Games 2024 ka ban sdang naduh 18 haduh 29 tarik mynta u bnai, yn pynlong ha Assam haduh 16 tylli ki jingïalehkai kiba kynthup ïa ka Athletics, Rugby, Basketball, Volleyball, Swimming, Badminton, Hockey, Fencing, Kabaddi, Football jong ki kynthei, Tennis, Malla-khamb, Judo, Table Tennis, Boxing ki kynthei bad ka Shooting. Katba kiwei ki jylla ka thaiñ shatei lammingi kin ïoh ban pynlong mar kawei ka jingïalehkai kata ka Arunachal Pradesh (Weightlifting), Meghalaya (Archery), Mizoram (Football ki shynrang), Sikkim (Boxing ki shynrang), Nagaland (Wrestling) bad ka Tripura (Yagasana).
