Jowai, Rymphang 15
Ka West Jaiñtia Hills District Cricket Association (WJHDCA) Jowai shen kan sdang noh ïa ka lympung ïalehkai kriket ba la tip kum ka T-20 Inter School Cricket Tournament 2024 (Deuce ball) na ka bynta ki khynnah shynrang bad kynthei ha ka kyrdan Under-16.
Kane ka la wan hadien ba ka West Jaiñtia Hills District Cricket Association ka la ïoh jingbit na ka District School Education Officer ka West Jaiñtia Hills District.
Kumta ka WJHDCA ka la khot bad wer ïa ki skul hapoh ka district ban wan ïashim bynta ha kane ka lympung kum shi bynta ban plie lad ïa ki khynnah kynthei bad shynrang ban ïalehkai.
Ïa kane ka lympung ïalehkai la khmih lynti ban sdang ha ka taïew ba nyngkong jong u Lber. La pyntip ba kane ka jingïalehkai yn pynïalehkai da ka Deuce Ball. Ki jingdonkam ban pynbiang ban ïashim bynta ha kane ka lympung ki long, ka bai rung kaba T. 3000 tyngka kawei ka kynhun, ka bai pynrung kyrteng ïa ki nongïalehkai kan long hapoh 15 ngut lane ym palat ïa ka 20 ngut.
Ka tarik ba khadduh ban pdiang ïa ka bai rung kan long ha ka 26 tarik mynta u bnai, ka tarik ban pynkhalai nusib ïa ki kynhun ïalehkai yn sa pynbna hadien. Katba ïa ka rta jong ki nongïalehkai ha kane ka lynpung ki dei kiba la kha hadien ka 31 tarik u Kyllalyngkot 2008. Ïa ki jingtip ba kham bniah lah ban phone ha kine ki nomber 7005666802, 7005217560, 8729912904 & 7085717725.
