Washington, Rymphang:
Katei ka khynnah na US ka la siat iap ia la u jong u kpa bad ia u para shynrang jongka bad hadien kata pat ka la pyntip sha ki pulit lyngba jong u nombar 911 ban ujor shaphang katei ka kam runar kaba ka la dep ban leh da lade hi. Katkum ka kaiphod ba la ioh da ka ïingbishar, la ong ba katei ka khynnah ka phla ba kam lah shuh ban tehlakam ia la ka jong ka jinglong bad ka jingkwah ka mynsiem jongka ban pyniap briew.
Ki heh pulit ki la iathuh ba ha ka por ba ki leit poi sha ka iingsah jong katei ka khynnah 17 snem kaba la ithuh kum ka Mashenka Reid, ki shem ia ka met jong u kpa bad u para jongka na katei hi ka iingsah jongki ha ka por shiteng sngi jong ka Sngi Thohdien ha kane ka taiew ba la lah. Kane ka la jia hapoh ka thaiñ Reno jong ka Nevada ha kaba katei ka iing ba ki sah ka don.
Katba la ong ba kiba dang lait im na katei ka jingjia ki long sa tang ka kmie bad ka hynmen jong katei ka khynnah bad kiba la shu khang bad setkut ialade hapoh ka kamra thiah kaba lah ban khang napoh bad kumta la ioh ban pyllait im noh ruh ia ki da ki pulit hadien ka jingleit poi jongki pulit ha katei ka iing.
Ki pulit ki la iathuh ba ha ka por ba katei ka khynnah ka phone bad pyntip sha u nombar 911, ka la iathuh hi da lade ba ka la dep siat ia u kpa bad ia u para jongka, bad ka la iathuh ruh ba utei u para shynrang jongka u la khlad syndon hashen.
Ha katei ka sngi la ong ba wat ki para marjan ruh ki la ialeh ban pyntip mar-mar sha ki pulit tang mar ia ïohsngew ia ka jing lynñiar bad ka jingsawa ki ktang suloi na katei ka iing ba marjan khnang ba ki pulit kin ioh ban tehlakam noh ia katei ka jingjia ha ka por kaba biang.
Katkum ka jingiathuh jong ki pulit, la ong ba utei u para shynrang jong katei ka khynnah, u dei uba dang ha ki rta ba 4 ne 5 snem bad u la shah ksam kuli na ki bynta jong ka khlieh bad nu la shu thiah iap lyngkrang ha ryngkat ka snam kaba la tuid na ka khlieh jong u- ha ka shuki kaba u shong hapoh ka kamra shongkai.
Ki pulit ki la iathuh ruh ba ha ka met jong utei u kpa pat la shem ia ki dak mong kuli na ki bynta ka shadem bad na met. Bad baroh 2 ngut kim don shuh naduh ka por ba leit poi ki pulit sha katei ka jaka.
Ki pulit ki la ioh kurup noh ruh ia ka suloi Walther PPS, ia kaba la ngeit ba ka dei katei hi ka tiar siat ba la pyndonkam ha katei ka jingjia.
Kumta, ki pulit ki la rah bad kem noh ia katei ka khynnah ha katei hi ka sngi bad la ñiew pyn ryngkat kyrdan ia ka bad kiba la 18 snem, ha kaba la pynngat ruh ia ka hapoh ki kyndon pynkheiñ aiñ bapher kiba iadei bad ka jing pyniap briew.
