Seoul, Rymphang:
Ka tnat iada jong ka South Korea ka la pyntip ba ka North Korea ha ka Sngi Balang ka la ther bun tylli ki ‘namding sha ki bynta ka duriaw Mihngi jong ka ha ka jingpyrshang ia ki tiar pynbthei bad ki ‘namding ba shyrkhei kiba ka dang iai shna bad thaw thymmai na ka por sha ka por.
Ha katei ka sngi, katei ka tnat iada jong ka South Korea ka la pyntip ba ki shipai jong ka ki la iohi bad ïohsngew ia ka jingbthei jong katto katne ki ‘namding sha ki um duriaw jong ka phang Shathei Lam Mihngi ka Wonsan ha ki por kumba 9:00 baje. Na ka liang ka tnat wad bniah jong ka South Korea ka dang bud dien bad jingtip thuh haba iadei bad katei ka jingpynher ‘namding be-aiñ jong ka North Korea ha katei ka sngi.
Kumjuh ruh la ong ba ka South Korea ka la pynkhlaiñ ia ka jingpahara bad ka jingleit syntiat ruh na man ki kylleng sawdong ki bynta jong ka ri khnang ban ioh peit thuh ia ka jingleh bad ka jinglong-jingman jong ka North Korea.
Dang shen ha kane ka taiew, la ong ba ka North Korea ka dang pynbna halor ka jingpyrshang pynher ia uwei u jait ‘namding ba thymmai u ban pynkhlaiñ bad long ka bor jong ka North Korea ha ki por ban wan.
Shuh shuh, la ong ruh mar ia mih une u snem thymmai, u nongialam ba hakhlieh duh jong ka North Korea u Kim Jong Un, u la pynbna ia ka South Korea kum ka nongshun ba radbah jong ka North Korea.
La ong ruh ba ka North Korea ka la pynkhlaiñ bha ia ki kam Nuclear ha kine ki sngi kynthup ia ka jingpyrshang pynbthei ia ki bom Nuclear na shapoh jong ka duriaw bad ha kajuh ruh ka por ka jingpynher ia ki ‘namding ‘Solid-Fuelled Hypersonic Ballistic Missile’.
