Shillong, Rymphang 16
U Lat ka Jylla u Phagu Chauhan ha ka sngi Thohdieng haba sdang ïa ka Dorbar Mang Tyngka, u la ong ba ha kine ki 5 snem ba la leit, ka jylla ka la sakhi ïa ka jingbei pisa kaba bun ha ka ban tei ïa ki jaka ïalehkai bad kumjuh ruh ka jingkiew ki kam ïalehkai.
U Lat u la kren ïa kane, haba ai jingkren ha ka sngi sdang ïa ka Dorbar Mang Tyngka bad ha kaba u la ong, ki jingtei kiba la ïaryngkat bad kiwei ki jingtei kiba la biang lut nadong shadong la lah ban tei, kum ka Wahiajer Multisport Complex ha Jaintia Hills bad ka Pa Togan Nengminja Sangma Athletic Stadium ha rilum Garo ïa kiba la dep ban plie paidbah ruh.
Kumjuh ruh ka jingtrei ban nang pynbha bad pynbit pynbiang ïa ka JN Stadium ha Shillong bad ka PA Sangma Sports Complex ha Tura ruh ka dang ïaid shaid shaid. Da ka jingtreikam jong ki 4 tylli ki centre ba thymmai ha u snem ba la leit, mynta la don sa ïa ka Khelo India Centre ha manla ki district jong ka Meghalaya, ha kaba la lah ban pynlong bun ki jingïalehkai naduh ka phutbol, tennis, archery, athletics bad badminton.
Nalor ka jingdon ïa ki madan bad ki stadium kiba paka, la lah ruh ban pynlong ïa bun ki lympung ïalehkai kiba heh ha Meghalaya mynta u snem. Ka lympung kaba heh tam ka dei ka jingpynlong ïa ka Meghalaya Games kaba 5 kaba la long ha ka sien ba nyngkong ha Tura bad ha kaba la wan ïashim bynta da palat 3 hajar ngut ki nongïalehkai ban ïakhun ha ki 22 tylli ki jait jingïalehkai bapher bapher.
Kiwei pat ki lympung ba la pynlong ki kynthup ïa ka 6th Meghalaya Kayak Festival, 2nd Sohra International Half Marathon, ka 7th Elite Men’s National Boxing Championship, ka 1st Meghalaya International Grandmaster Chess Tournament bad ka lympung 10th East Zonal Shooting Championship.
Kumjuh ruh ka lympung Chief Minister’s Under-12 Football Tournament bad ka Chief Minister’s Inter-School Athletic Meet ha kaba la wan ïashim bynta da ki 12 hajar ngut ki khynnah na kylleng ka Jylla. Ki khynnah ïalehkai ka Meghalaya Under-18 Boy’s Football Team ki la khur takma ksiar ha ka Khelo India Youth Games 2023, hadien ba ki la jop ka takma rnong ha u snem ba la lah. Ka kynhun ïalehkai phutbol ka Meghalaya ka la wan ha ka kyrdan kaba ar ha ka lympung 76th National Football Championship na ka bynta ka Hero Santosh Trophy.
