Imphal, Rymphang:
Ki la don kumba 2 ngut ki briew kiba la ïap bad palat 30 ngut kiwei pat ki la mynsaw ha ka por ba ka la don ka jingïakynad hapdeng ka kynhun jong ki shipai ïada ri bad ki riewpaidbah ha Churachandpur distrik ha ka janmiet jong ka sngi Palei. Ïa kitei 2 ngut kiba la ïap la tip kyrteng kum u Letlalkhuol Gangte uba dei u khun jong u Kamkhomang Gangte na ka shnong Nalon bad u Thanggunlen Haokip uba dei u khun jong u Seilal Haokip na ka Canaan Veng.
Kane ka jingjia ka la jia haba ka kynhun jong ki paidbah kiba la dap da ka jingbitar ki la pyrshang ban tur sha ka jaka treikam jong u Superintendent of Police ha Churachandpur hadien ka jingshah weng kam shipor jong u Head Constable hadien ba u la shah kynnoh ba u la donlang ha ki durkhih bad ki riew kieng atiar.
Hashwa kane, u SP jong ka Churachandpur u Shivanand Surve u la weng kam noh ïa u Siamlalpaul, u Head Constable jong ki pulit ka Manipur, ha kaba ïadei bad ka durkhih kaba la saphriang kylleng ha kaba la ïohi ba u la ïadonlang ha ka jingshondur bad ki riew kieng atiar bad ki nongïarap shnong ha ka 14 tarik, Rymphang.
