New Delhi, Rymphang:
Kiba bun na ki seng jong ki nongrep kynthup ïa ka seng Samyukta Kisan Morcha (SKM), ki la khot pynlong da ka Gramin Bharat Bandh, kaba long ka jingïakhih jong ki nongrep ha baroh kawei, ha ka sngi Thohdieng kata hynnin ka sngi, kum shi bynta ban nang pynjur shuh shuh ïa ki jingdawa hakhmat ka sorkar kmie. Ka seng SKM ka la kyntu ïa baroh ki seng jong ki nongrep ba kin ïasnohktilang bad ban long shi bynta jong ka Bharat Bandh kaba la khot pynlong da Central Trade Unions.
Ka jingkhot pynlong ïa ka Bharat Bandh ka la long ha ka por ba dang don ka jingïakhih ‘Delhi Chalo’ da ki spah ngut ki nongrep, kiba la ïaid kjat na Haryana, Punjab bad ki la shah pynsangeh noh ha khappud Haryana hajan Ambala kaba jngai kumba 200 kilometres na Delhi. Ki shipai pahara jong ka Haryana ki la pyndonkam da ki tyndong lyer pynsat khmat pyrshah ïa ki nongrep ban pyrshang pynpra ia u paidbah. Ka seng SKM (ka bym dei ka seng saiñ pyrthei) ka la bthah ïa baroh ki kynhun seng jong ki nong-rep ba kin leit ban ïasnohktilang ha ka Bharat bandh, kaba dei ka sngi ban pynlong ïa ka jingïakhih kaba la sdang naduh ka 6 baje mynstep haduh ka por 4 baje janmiet.
Ki nongrep ki la rai ban ïashim bynta ha ka Chakka Jam ha ki bynta jong ki surok bah ha kylleng ka ri India naduh ka por 12 baje nohphai sngi haduh ka por 4 baje janmiet. Ha Punjab, ka bynta kaba bun jong ka jylla bad ki surok bah ki la khang da kumba saw kynta.
