Shillong, Rymphang 16
U rangïalehkai shakhmat ka France bad PSG u Kylian Mbappe u la dep ban kren bad pynpaw sha ki bor pynïaid ka klob ba u don jingthmu ban mih noh ha kaba kut jong kane ka aiom ïalehkai.
Ka kontrak jong une u rangïalehkai ba dang 25 snem bad ka PSG ka la jan poi sha kaba kut. Nangta la ong ruh ba ka la don lypa ka jingïakren ba un leit ban pynïasoh noh ïalade sha ka Real Madrid.
Lah ban pynkynmaw ba ha ka aïom ba la dep, ka la don ka jingbym ïasngewthuh halor ka lawei jong u Mbappe ha kane ka klob bad ha kaba ka kyrteng jong u Mbappe kam shym la shah kynthup satia ha ka thup kyrteng jong ki rangïalehkai ba la leit ban ïalehkai paralok bad ki klob ka dewbah Asia shwa ban sdang kane ka aiom.
Hynrei la ong ba la poi sha ka jingïasngewthuh jingmut kaba la pynthikna ïa ka PSG ba kan nym duh watla u Mbappe u la pynpaw ka jingbym sngew tynnad hynrei haduh mynta ym pat lah ban pynthikna pat ïa kane ka rai ka jong u.
Une u rangïalehkai shakhmat u don ïa ka kontrak kaba don ïa ka kyndon kaba lah ban pynjlan da shi snem, kumta la khmih lynti ba ka jingmih jong une u rangïa-lehkai, kan dei lyngba ka dor ne ka jingpyllait ei noh hi jong une u rangïalehkai ïa ka pisa.
Wat la ka PSG kan dang kwah ba u Mbappe un dang ïai neh hapoh ka club, hynrei ka jingmih jong u ka lah ban urlong noh namar ka jingangnud ka club ka long ban pynkhreh ïa ka kynhun ka ban kynthup da ki rangïalehkai ba dang kham khynnah, bad ïa kane la lah ruh ban ïohi na ka jingmih noh jong u Lionel Messi bad u Neymar ha kaba kut jong ka aiom kaba la lah.
