Shillong, Rymphang 16
Shwa ka jingsdang jong ka Ranji Trophy 2023-2024, ka Meghalaya Cricket Association ka la don hapdeng ka jingpyrkhat la kan nang khot ne em ïa ki guest player na ka bynta kane ka lympung. Kane ka la dei ka rai kaba eh ba ka la shim ban pynmih bad shaniah ha ki khynnah lajong.
Wat la ka dei ka rai kaba eh, hynrei ka la seisoh pat na ka bynta ka jylla namar ka Meghalaya ka la rung sha ka final jong ka Ranji Trophy Plate Group ban ïakhun pyrshah ïa ka Hyderabad.
Ka jingïakhun ïa ka final kan sdang ha ka sngi Saitjaiñ naduh ka por 9.30 mynstep ka ban long ha Rajiv Gandhi International Stadium ha Hyderabad.
Ka Meghalaya ka la sdang ban ïakhun ïa ka lympung Ranji Trophy Cricket naduh u snem 2018-19 bad manla u snem ki la pyndonkam beit ka jingshakri jong ki ‘guest players’ kaba la shah katkum ki kyndon jong ka BCCI. Ki katto katne ki ‘Guest Player’ kiba la shakri ïa ka jylla ki kynthup ïa u Punit Bisht, DB Ravi Teja bad kiwei, kiba la ïarap ruh ban kyntiew ïa ka rukom ïalehkai jong ki khynnah ka jylla ha kine ki snem.
Ka Meghalaya ha kane ka aiom ka la mad ki jingeh bad jingjop, kata ban khur 3 tylli ki jingjop bad ar tylli ki nam rem kiba heh ha ka round robin stage.
U Kishan Lyngdoh, kapten ka Meghalaya ha kane ka aiom u la thaw rikod ruh da kaba tied 268 run ban kylla long u nong Meghalaya ba nyngkong ban tied palat 200 run ha ka lympung Ranji Trophy kata ha ka jingïalehkai ba nyngkong pyrshah ïa ka Arunachal Pradesh.
Nalor kane, u Kishan ha kiwei pat ki jingïalehkai kiba dang sah u la lah ban tied haduh saw tylli ki run ba long palat ïa ka 50 run, kynthup kawei pyrshah ïa ka Hyderabad bad kawei pyrshah ïa ka Mizoram ha ka semi-final. Kumba long mynta, u don ha ka kyrdan kaba phra ha ka jingtied bun run eh, kata hadien ba u la tied 657 run ha ka average kaba 82.13.
U Akash Kumar Choudhury uba dei u nongkawang bol, watla u la duh ar tylli ki jingïalehkai sdang namar ka jingshitom hynrei u la wan phai pat da ka jingjop, ha kaba u la khur 10 wiket ha ka jingïakhun pyrshah ïa ka Nagaland. U Aksah u la khur haduh 31 tylli ki wiket na ki saw tylli ki jingïalehkai bad ban don ha ka kyrdan kaba 10 ha ka thup jong ki nongkhur wiket bun.
Ki rangïalehkai ka Meghalaya ban ïakhun pyrshah ïa ka Hydera-bad ki long u Akash Kumar Choudhury, Anish Charak, Arien B Sangma, Aryan Borah, Cheng-kam Sangma, Dippu Sangma, Jaskirat Singh Sachdeva, Kishan Lyngdoh (Captain), Pringsang Sangma, Ram Gurung, Ribok-lang Hynniewta, Raj Biswa, Sanvert Kurkalang, Swarajeet Das bad u Yogesh Tiwari.
Katba ki Standbys pat ki long u Rounak Nongrum, Adarsh Joshi, Bijon Dey, Himan C Phukan, Manish K Rai bad Lerry G Sangma. Ki Support staff ki kynthup ïa u Goutam Shome (head coach), Moisten Ch Marak (assistant coach), Vikash S Chauhan (trainer), Surojit Biswas (physio), Dister Marbaniang (manager).
