U Nongsaiñ Hima, 1983
Uwei pa uwei u briew nalor ba u dei ban ioh ïa ka bam ka sa, ka jain ka nep ka ïing ka sem, u dei ruh ban ioh ïa ki jinghikai shong tynrai. Kawei na kita ki jinghikai shong tynrai ka long ban mut ïa kaba bha, ban leh ïa kaba dei bad ban kren ïa kaba shisha. Dei namarkata, ïa u khynnah, ha ki skul la ju ïai ban ïai ong ïa u ban mut ïa kaba bha, ban leh ïa kaba dei bad ban kren ïa kaba shisha.
Ki Khraw Pyrkhat ki la sngewdonkam ban buh ïa katei ka jinghikai shongtynrai ha ka sur, khnang ba u khynnah un lah ban kynmaw, da kaba dwai bad ba kan long doh long snam bad ïai tuid khlem sangeh ba ki thied jong ki jingpyrkhat jong u. U Riewstad u ong “Hikai ia u khynnah ha ka lynti ba u dei ban ïaid, te un ym bakla wat ynda u la tymmen.” Ka jingkylli kaba mih ka long, kum ka Jaidbynriew, ngi ju pyrkhat ne em ban bsuh ha ka jabieng bad dohnud jong ki khynnah bad samla ïa ki jinghikai shongtynrai kiba bha. Ngi ud ngi nam ba ka long bynriew manbriew ka la nurom. Ngi iohsngew ruh narum naneng na ka khlieng ka tyngab ba ka burom ka akor jong ki katto katne ki para doh para snam, ki para kur para kha ka la hiar than eh.
Teng teng sngewjew ban tip ba don ki briew kiba sngewtynnad ïa ka IOHEI – ym hap siew, ym hap pynlut da ka umsyep la jong. Nalor ba ki sngewtynnad, sngewkhaiñ wat ban ïathuh khana khyllew ha la ki lok ki jor, ha ki marjan marpa, ba ki shu IOHEI. Teng teng sngewlyngngoh hi jlang ban tip ba don ki briew kiba sngewdei bad bym sngewrem ban shim ïa ki mar ki mata, ki tyngka ki pisa kiba ym dei hok ki jong ki. Shano kata ka HOK, shano kata ka Jingshisha. Ngi ibeiñ ïa ki ngin phasi ruh ïa ki ne yn beh noh ïa ki sha ki mrad khlaw ?
Ban tip ba ka dei ka jingshisha bad ban ym nud ban kren ïa ki kumba ka long, ka dei tang ka jingkhawpud. U Riewstad u ong, “ki Khawpud ki ïap bunsien, shuwa ba kin dkut mynsiem hynrei ki ‘riewshlur ki mad ïa ka jingiap tang shisien.” Bun ki briew kiba khraw ki la duh ïa la jingim namar ba kim riej ban kren ïa ka jingshisha Uwei u Rangbah jong ka Ri Amerika U Abraham Lincoln shisien u la rem ha ka Election kaba u ïaleh namar ba u kren tang ïa ki jingshisha. Ki paralok jong u ki la dom ïa u, namar ba um nang ban kren Hynrei u Abraham Lincoln kum u Rangbah, u Rangkynsai, u Rangkynsih, u Rangphawar khlem jingsheptieng u la jubab, “Ym dei ïa nga tang ban shu jop hynrei ban bat skhem ïa ka jingshisha.”
Kum ka Jaidbynriew kum U Paid Khasi hangno ngi don mynta ? Hato ngim la dei ban kyndit naba iohthiah bad ban bsuh ha ki khynnah bad samla jong ka Pateng Mynta ban mut ïa kaba bha bad leh ïa kaba dei ban kren ïa kaba shisha. Haba shu kren lyngkot ban im tipbriew tipblei la im la iap. Kum ban shu pynkynmaw ha ka Muhor jong ka Ri India la buh ïa kine ki kyntien ‘SATYAMAVE JAYATE.” Ha ka ktien Khasi kaba lyngkot lah ban ong.
“Dei Tang Ka Hok Kaba ïeng Rasong”
