Dubai, Rymphang:
Ka Houthi kaba dei kynhun lehnoh na Yemen bad kaba ju ioh jingkyrshan na ka Iran, ha ka Sngi Palei ka la pynbna bad shim jingkitkhlieh halor ka jingther ‘namding sha ka jhad jong ka Britain kaba don ha ki bynta duriaw ba marjan bad ka.
Kane ka jingpynbna ka wan hadien ba 2 tylli ki kynhun syntiat ki la pyntip ia ka jingsdang thombor biang jong ki lehnoh na Yemen bad ka long ruh hadien ba ka United States ha katei hi ka Sngi Palei ka la pyntip ba la ioh kurup ia ki tiar jong ka Iran ha ka jingioh bat jongka ia ki lehnoh na Yemen ha u bnai ba la leit.
Katei ka jingioh kurup jong ka US ha utei u bnai Kyllalyngkot, ka la long hadien ba ka US ka la trei shitom ban tehlakam ia ki kam thombor jong ki lehnoh Houthi khamtam sha ki phang iaid jhad lyngba jong ka Gulf of Aden bad ka Red Sea, ha kaba kitei ki lehnoh ki ju kham pyni bor bha.
La ong ba ha ka step Sngi Palei, u nongrah ktien jong katei ka kynhun lehnoh Houthi u la pyntip ba katei ka kynhun ka la ther ‘namding sha ka jhad jong ka Britain katba ka dang iaid lyngba ia ka Gulf of Aden.
