Shillong, Rymphang 16
Ka South Korea ka la sliah noh ïa ka kam Coach na u Jurgen Klinsmann tang hadien 12 bnai ba la thung ïa u ha kane ka kam. U Klinsmann ba la 59 snem ka rta, u la shah thung kum u Coach ha u bnai Rymphang jong u snem ba la dep (2023) ha ka kontrak ka ban kut haduh ka World Cup 2026.
Kane ka jingshah sliah noh jong u Klinsmann ka dei hadien ka jingshah liem noh jong ka South Korea ha ka jingïakhun semi-final jong ka lympung Asian Cup kaba la pynlong ïa kane ka Ri ba kan dang hap ban ap ïa ka nam lahduh ba nyngkong watla ïaid 64 snem.
Nalor kane, ka la don ruh ka khubor ba ka la don ka jingbym hun hapdeng jong ki rangïalehkai kiba kham paw jong kane ka Ri.
Wat hadien ka jingshah rem ha ka Jordan, kaba ïapher haduh 64 tylli ki kyrdan, kata kaba don ha ka kyrdan kaba 87 hadien jong ka South Korea ha ka pyrthei, hynrei u Klinsmann u la ong ba um don jingthmu satia ban hiar na kane ka kam.
Hynrei ha ka sngi Palei, ki bor pynïaid phutbol ki la ong ba une u rangïalehkai barim ka Germany, kumba ka paw mynta la sngew ba un nym lah shuh ban leh eiei ne ban pynkylla.
“Ngi la poi sha ka jingïasngewthuh jingmut ba u Klinsmann un nym lah shuh ban pyntreikam ïa ka kam nongïalam kum u Coach jong ka Ri na ka bynta kiba bun ki daw bad kumta, la donkam ban bujli noh ïa u nongïalam,” la ong u Hwangbo Kwan jong ka KFA.
U Klinsmann naduh ba u la pynïasoh sha ka South Korea, um shym la long satia u briew ba paw ha kane ka Ri bad ha ki hynriew tylli ki bnai kiba nyngkong ha ka kam, kawei na ki lad pathai khubor ka Seoul ka la ong ba u Klinsmann u la pynlut tang 67 sngi hapoh ka Ri, haba ïanujor bad kiwei pat ki coach kiba ju don beit hapoh ka nongbah jong ka Ri.
