New Delhi, Rymphang:
Wat hapdeng ki jingmaham bad jingdawa jong ki ri bad ki tnat bapher bapher ia ka Israel ba ka dei ban sangeh noh ia ka thma ha Gaza, hynrei ka Israel ha ka Sngi Balang ka la byrngem ba kan phah leit hiar thma jur pynban ia ka nongbah Rafah jong ka Gaza hadien ba ka la ioh pyllait im ia 2 ngut kiba shah rahbor ha ki lehnoh Hamas naduh kaba sdang jong ka thma.
La ong ba ki tnat bad ki ri bapher bapher naduh kine ki sngi ba la leit, ki la dawa ia ka Israel ba ka dei ban sangeh noh ia ka thma ha ki bynta Shathie jong ka nongbah Gaza namar ka dei ka jaka kaba bun na ki nong Palestine kiba don hapoh Gaza ki leit ban shong rieh tngen katba ka thma ka dang iaid shakhmat.
Namar la ong ba u Myntri Rangbahduh ka Israel- u Benjamin Netanyahu naduh ka taiew ba la dep, u la dep bthah lypa ia ki shipai ka ri ba kin long ba la khreh ban leit hiar thma sha Rafah kaba da ki million ngut ki nong Palestine ki shong ki sah bad ki la leit buhai sha katei ka bynta naduh ba la iaid ka jingiakhun thma hapdeng ka Israel bad ki lehnoh Hamas ha kiwei pat ki bynta jong ka Gaza.
