Bangkok, Rymphang:
Ki bor pyniaid jong ka Bangkok ha kane ka kynti ki la kyntu ia baroh ki nongtrei kiba don ha katei ka nongbah ba kin shu trei noh na iing namar ka jingjaboh jong ka lyer ha katei ka nongbah kaba la palat bad ka jinglong jingman jong ka mariang kam long shuh kaba bit ia ki briew ba kin mih shabar bad ban ring mynsiem ia katei ka lyer kaba la sop da u pum-pum ha baroh ki thaiñ kiba bun jong katei ka nongbah.
Namarkata, ki bor pyniaid jong katei ka nongbah ki la kyntu ia ki trai jong ki kompeni bapher kiba pyntreikam hapoh katei ka nongbah, ba kin ailad noh ia ki nongtrei jongki ba kin shu trei noh na iing kum shi bynta ban iarap bad tehlakam ia ka jing jabor palat jong ka lyer ha ka mariang bad ha kajuh ruh ka por kan long ka jingiada ia kitei ki paidbah kiba leit ba wan naba kin hap ban ring mynsiem ia katei ka lyer kaba rben bad kaba dap da ki pum-pum.
Katkum ka kaiphod na ka tnat IqAir kaba ju dei khmih bad peit bniah ia ka jinglong jingman jong ka lyer ha ka mariang, la shem ba ka nongbah Bangkok ka long kawei napdeng ki 10 tylli ki nongbah ha ka pyrthei kiba ka jinglong jong ka lyer ka la sniew bha ia ki paidbah bad ia ka mariang ruh kumjuh.
Kumta, la ong ba ki paidbah ki ap jingma haduh katta na ki pum-pum ‘PM2.5 Particles’ kiba rit bha bad kiba lah ban rung shaduh ki thied- ki jaw kiba pyniaid ia ka snam.
Haba iadei bad kane, u Lat ka nongbah Bangkok- u Chadchart Sittipunt ha ka miet Sngi Balang, u la pynbna ba baroh ki nongtrei kiba don ha katei ka nongbah, kin hap ban shu trei noh na iing ha man ki Sngi Palei bad Sngi Thohdieng jong ka taiew.
