Beirut, Rymphang:
Ka kynhun lehnoh Hezbollah kaba ju ioh jingkyrshan na ka Iran, ha ka Sngi Thohdieng ka la pynbna ba kan nang pynjur ia ki kam thombor pyrshah ia ka Israel hadien ba 10 ngut ki nong Lebanon ki la khlad na ka jingther bom jong ka Israel ha kane ka taiew ba la leit. Namarkata, katei ka kynhun lehnoh ka la ong ba ka Israel kan hap ban ioh bainong da ka snam namar ka snam.
Namar kumba la iohi ruh ba ka jingiakynad hapdeng ka Hezbollah bad ka Israel ka la sdang ban jur khamtam ha ki bynta khappud jong ka Israel bad Lebanon naduh ba ka Israel ka la leit hiar thma pyrshah ia ka kynhun lehnoh Hamas kaba synshar hi ia ka nongbah Gaza jong ka ri Palestine.
Haba ai jingkren sha ki lad pathai khubor ha katei ka sngi, u nongialam ka Hezbollah- u Sayyed Hassan Nasrallah u la kynnoh ia ka Israel ba ka thombor ia ki paidbah ka Lebanon. Namarkata u la ong ba ka Lebanon kam lah ban pdiang ia katei ka jingleh don bor jong ka Israel bad kumta kan pynhiar kput lang kumjuh.
