Shillong, Rymphang 18
Ka kynhun ïalehkai ka Jylla ka la shah pynhap wiket baroh ki nongtied na ka bynta ban kamai tang 108 run ha ka sngi kaba nyngkong jong ka jingïakhun final ha ka lympung ïalehkai U-23 men’s Col CK Nayudu Trophy (Plate Group) pyrshah ïa ka Nagaland ha ka sngi U Blei.
Ka Meghalaya kaba la kam trai ban tied nyngkong ha ka jingïakhun kaba la long ha Sovima, Nagaland hadien ka jingsangeh ïalehkai na ka daw ka jingbym biang ka madan ïalehkai.
U Mrityunjay Bharali u la lah ban ïalehkai bha kum u nongtied mynta ka aïom da kaba kamai 43 run na ki 96 bol.
Haba wan beh ïa ka thong, ka Nagaland ka la kynjoh sha ki 50 run bad shah pynhap shi wiket. Kane ka la wan lyngba ka jingïalehkai bha u Abhishek Kumar uba la lah ban pynhap ïa u Zipa Pohena. Te kumta ka Nagaland kan bteng biang ïa kane ka jingïakhun ha ka sngi kaba bud.
