Shillong, Rymphang 18
Ka Shillong Lajong FC ka la wanphai da ka jingjop ha ka lympung ïalehkai I-League hadien ba ka la lah ban pynliem noh ïa ka Neroca FC da 2-0 kol ha ka Sngi U Blei ha SSA Stadium, Polo.
Kane ka nam jop ka la wan urlong lyngba ki ar kol ba thep da u Kynsaibor Lhuid na ka bynta ban pynlong ïa kane ka kynhun ïalehkai ka nongbah ban khur ïa ki lai point.
Kum ban pynkynmaw, ka Shillong Lajong FC dangshen ka la shah rem ha ka Gokulam Kerala ha ka jingïalehkai shabar na la iing. Pynban ha kane ka jingïakhun ka la pyrshang ban ïakhun tyngeh naduh kaba sdang, hynrei baroh ar kynhun kim shym la lah ban thep kol haduh kaba kut jong ka kylla step.
Dei ha ka kylla miet ba ka Lajong ka la pyrshang ban ïakhun tyngeh ha kaba ka la ïoh ban pynkhih jar nyngkong eh lyngba u Kynsaibor ha ka minit kaba 52. Kane ka shi kol ka la pynlong ïa kane ka kynhun hapoh ka jingïalam u Bah Bobby L. Nongbet ban ïakhun tyngeh shuh shuh bad une u rangïalehkai shakhmat u la ïoh ban pynbud biang ïa ka kol kaba ar ha ka minit kaba 61 na ka bynta ban tam ar kol.
Ka Neroca ka la pyrshang ban ïakhun na ka bynta ban pynphai, hynrei kam shym la lah ban pynphai haduh kaba kut bad ka la mad ia ka jingshah rem kaba shiphew ha kane ka lympung.
Lyngba kane ka jingjop, ka Lajong ka la kiew shi kyrdan na ka bynta ban don ha jaka ba hynriew bad kamai 22 point na ki khatsaw sien ïakhun, katba ka Neroca ka la ïai sah ha ka kyrdan ba-ar na shatrai bad 7 point.
Kumta ka Lajong kan pynkhreh biang ïa ka jingïakhun shabar na la ïing pyrshah ïa ka TRAU FC ha ka 25 tarik mynta u bnai ha Kalyani Stadium, Kolkata.
