Paris, Rymphang:
U President jong ka France, u Emmanuel Macron haba iakren bad u Myntri Rangbahduh ka Israel ha ki khyndiat sngi ba la leit, u la ong ba ka jingïap ki briew ha Gaza ka la jur bha bad kumta ruh ka Israel ka dei ban sangeh noh ia ka jingleit hiar thma ia ka Gaza Strip namar ka la ktah jur palat ia ki paidbah nongshong shnong jong katei ka nongbah.
Ha ka jingiakren lyngba ka ‘phone’ bad u Myntri Rangbahduh ka Israel, la ong ba u Macron u la kren da ka sur kren kaba kham eh bad u la pynpaw ia ka jingbym lah pdiang jong ka France haba iadei bad ka jingduh ei ia ki mynsiem briew ba lui-lui hapoh Gaza. Wat la ia katei ka thma la sdang hi da ki lehnoh Hamas na Gaza hynrei u la ong ba ka Israel ka dei pat ban pyrkhat lem ia ki mynsiem ba lui-lui kiba shong bad kiba don hapoh Gaza.
Kumta ruh u Macron u la pynpaw ia ka jingsngewkhia kaba jur halor katei ka thma jong ka Israel bad ka Hamas, bad u la ong ruh ba ka long kaba donkam ban sangeh noh ia ka thma khlem da pynslem ne buh-teng shuh ioh kaei-kaei kaba kham sniew kan wan jia nangne sha khmat.
