Ka Rep ka Riang ka kynthup ïa kine ki jingthung kum kaba thung kaba ha ki pynthor bad ha ki jaka lum. Kaba rep kwai riewhadem, dongkit, thung rymbai ne tonnai, thung Ri, motor thung phrisbin, kubi, sohtrun kaba thung ne rep dieng sohniamtra, soh kwit, sohpriam, sohjew, kwai, tympew, sohmrit, sohkynphor, thung diengkait ne ladew, thung ki jait jhur ba bun jait. Nangta kaba thung piskot, thung latyrpat ne lasi, rep synsar ne rep kdait, rep slasha kaba rep shytri lyngkha ne rep jhum, kaba rep ha ki Hali ne pynthor kaba rep phan, piat, rynsun, rep shynrai, sying, soh snepkor, bad rep ki jait soh ba bun jait, rep kli jait jhur ba bun jait, kaba shna ki pung ri dohkha bad kiwei kiwei ki jait jingrep ki kynthup ha ka rep ka riang. Namarkata ka rep ka riang ka long kaba kongsan tam ha ka jingim jongngi ki briew. Man ki jaitbynriew ha satlak ka pyrthei ki niew ïa ka rep ka riang kum u thied snem ha ka jingim. Khlem ka rep ka riang ngin ym im hangne ha sla pyrthei. Dei lyngba ka rep ka riang kaba lah ban kyrshan bad pynim ïa ngi ki briew naduh ki por mynbarim haduh kine ki sngi ba mynta ruh. Ki tymmen ba mynshuwa lei ki ju im da ka rep ka riang bad ki ioh ka bam ka sa pahuh ha ka jingim jong ki. Dei na kane ka daw ba mynta ruh ki ong ba ka rep ka riang ka long u budlum ka ri bad ka jaitbynriew. U nongrep u long u nongbsa bad u nong pyndap ïa ka bam ka sa ha baroh ki aiom jong u snem. Mynta ki por lei lei ki riewstad bad ki riew shemphang ha ka rep ka riang ki hikai bad pynshai ïa ki nongrep ban rep ha kata ka rukom kaba lah ban ioh kham bun kai jingmih bad ai jingmyntoi da bun spah shah ïa kaba la ju leh ha ki por mynshuwa. Ka rep ka riang ka long da shisha kum u thied snam ha ngi ki briew. Uba smat ban rep ban riang u ioh kyrhai ka bam ka sa bad um ju khuslai lada wan kano kano ka eriong erngit ha ka jingim. Kumta lada ngi rep ha ki jaka them ne ki jaka lum ne shapoh lawbah ruh ka long kumjuh, ka rep ka riang ka sah hi la ka rep ka riang bad kam ju pynleh noh ei ha ngi ki briew. ka rep ka riang ka long ka mynsiem jongngi ki briew. Ka rep ka riang ka long thik kum u thied snam ha ngi ki briew.
C. B. Iawphniaw
