Kiryat Malakhi, Rymphang:
Katkum ki khubor la iathuh ba 2 ngut ki la khlad noh hadien ba uwei u runar u la synreit kuli naphang ha ka jaka sangeh bos kaba bun briew hapoh ka thaiñ Kiryat Malakhi jong ka Israel ha ka Sngi Thohdieng.
La iathuh ba ia kitei 2 ngut kiba khlad la pynkit noh sha Kaplan Medical Center ha kaba ki bor pyniaid hospital ki la pyntip ba kim don shuh naduh ka por shwa ban poi sha katei ka jakasumar. Na ka liang ki pulit ki la iathuh ruh ba 4 ngut kiwei pat ki la ngat bad mynsaw lang ha katei ka jingjia.
Hynrei la ong pat ba utei u nongsiat ruh u la khlad lang ha katei ka jingjia bad ka met jong u ka dang don ha katei kajuh ka jaka. Nalor kata, ki pulit ki la iathuh ba dei ki briew kiba don ha katei hi ka jaka kiba la siat iap lang ia utei u nongsiat ha katei ka jingjia.
