Kiba bun ki dang kynmaw ïa ka jingïakynad hapdeng ki nongrep bad ka Sorkar Pdeng kaba la neh la shi snem naduh u snem 2020 haduh 2021 halor ki lai tylli ki aiñ – The Farmers Produce Trade and Commerce (Promotion and Facilitation) Act, 2020; The Farmers (Empowerment and Protection) Agreement of Price Assurance and Farm Services Act, 2020; bad ka The Essential Commodities (Amendment) Act, 2020 – ba la wanrah da ka sorkar u Narendra Modi. Kane ka jingïakynad ka la ïalam shaduh ka jingtur da ki traktor sha nongbah Delhi ha ka sngi ba rakhe ïa ka Republic Day ha u snem 2021 katba da ki spah ngut ki la ïoh rung syndon sha Red Fort, kaba long kawei ka jaka sah nam bad ka jaka ba ju pynlong ïa ka jingrakhe Independence Day. Kane ka jingïakhih jong ki nongrep ka la long kaba sah kynmaw ha kaba na ka liang ka sorkar u Modi ka la hap ban weng noh ïa kitei ki lai tylli ki aiñ. Ka bor jong u paidbah ka la jop pyrshah ïa ka bor jong ka sorkar.
Sa ha kane ka kynti, hadien saw snem duna eiei, ki nongrep ki la mih biang sha surok ban leit tur sha Delhi ban dawa na ka Sorkar Pdeng ban wanrah da ka aiñ ka ban pynthikna ba kan don ka ‘Minimum Support Price’ (MSP) ïa baroh ki mar rep, jingmap noh ïa ki ram ki shah ba la shim da ki nongrep, bad ka jingpyntreikam ïa ki jingai jingmut ka Commission ba la khlieh da u Dr MS Swaminathan uba long uwei na ki ‘riewshemphang ha ka liang ka rep ka riang ha ka Ri bad uba ka Sorkar Pdeng dang shen ka la pynbna ba kan ai da ka khusnam ‘Bharat Ratna’. Tang ba la ai khusnam ïa u ‘riewshemphang ha ka rep ka riang kan ym lah ban pynhun ïa ki nongrep kiba dei shisha ki budlum jong ka Ri. Khlem ki nongrep kiba trei shitom, ka Ri kan kyllon.
Ka Sorkar Pdeng ka la phah ïa ki Myntri jong ka ban ïakren bad ki nongïalam jong ki kynhun nongrep. Ki jingïakren ki la dep bad kin dang bteng ha kine ki sngi. La sngewthuh ba ka Sorkar Pdeng kam kwah ban leh da ka bor ïa ki nongrep namar ka ilekshon MP Lok Sabha ka la jan. Kam lah ban pyni bor palat pyrshah ïa kine ki nongshong shnong kiba pyndap ïa ka bam ka dih ha ka Ri. Ban shu kohnguh ïa baroh ki jingdawa ruh, ka Sorkar Pdeng kam lah namar ka hap ban pyrkhat naei kan pynmih pisa ban kyrshan ïa ki nongrep na ka daw ba ka hap ban peit sa ïa kiwei ruh ki nongshong shnong. Ban shu kyntait lut ïa kitei ki jingdawa ruh, ka Sorkar Pdeng kan mad jingeh. Shaei yn poi haba kumta? Ka por, ha kine ki khyndiat sngi ki ban wan, kan sa batai kaei ka ban jia.
Ngi kyrmen ba ki jingïakren hapdeng ka Sorkar Pdeng bad ki nongrep kan ïalam sha ka jingseisoh namar ngim lah ban shu peit da ki khmat katba ki nongrep jong ngi ki ïakhun ha surok. Ka Sorkar Pdeng ka dei ban wad ïa ki lad ki lynti ban ïarap ïa ki nongrep khnang ba kan ym ktah ïa ka Ri hadien habud. Ha kane ka Ri, kiba bun ki dei ki nongrep bad khlem ma ki, kan long kaba jynjar ban ïa ïoh bam ïoh dih man la ka sngi. Ki dei ki nongrep kiba pyndap ïa ki pliang ja ki jong ngi. Ngim dei ban haram ïa ki.
Lada ki nongrep kim hun, ka sorkar kam dei ban shu leh jubor, bad ka dei ban burom ïa ka jingsngew ka jong ki. Ngim kwah ba kan mih biang ka jingïakynad kaba jur, hynrei ba kan don noh ka jingjai-jai ha ka Ri. Ki nongrep ki dei shisha kita ki budlum jong ka Ri bad lada kim don ma ki, ka jingkordit ka la ap lypa ïa baroh. Ka sorkar kam dei ban ïalehkai bad ki nongrep namar lada ïalehkai sa ki nongrep, ka Ri jong ngi shano tip kan poi. Ka Sorkar Pdeng ka dei ban sngewthuh ba kam lah ban shu leh donbor kat ïaba don. U don u pud ïa kiei kiei baroh.
Ngi kyrmen ba ka jingbha kan synshar ha ka Ri khnang ba ngin lait na ka saw ka sian. Ka sorkar, kum ka kmie, ka dei ban sngap ïa baroh ki nongshong shnong kiba don la ki jong ki jingeh bad jingïakynduh bad ka dei ka kamram jong ka sorkar ba kan weng ïa ki jingeh bad ban kham pynsuk ïa ka jingim jong ki paidbah namar ka la smai ba kan leh bha ïa baroh. Ngin sa nang ïa peit ha kine ki sngi kiei ki jingjia ki ban mih na kane ka jingïakhih jong ki nongrep bad hato ka sorkar kan lah ne em ban pynkohnguh ïa ki nongrep ba kin leit phai noh sha la ki shnong ki thaw.
