Aizawl, Rymphang:
Ki shipai jong ka Assam Rifles ki la lap bad kurup ïa u drok Heroin bad ki song jong u drok kiba shong dor T. 130 klur ha Mizoram ha ki 45 sngi, la ïathuh ki heh shipai.
Naduh u Kyllalyngkot jong une u snem haduh ka 15 tarik, Rymphang, ki shipai Assam Rifles ki la lap bad kurup ïa ki song jong u drok uba shong dor T. 130 klur ha Mizoram.
“Naduh u Kyllalyngkot 2024 haduh mynta, ki shipai Assam Rifles ha Mizoram ki la ïoh ban kurup da kumba 4.009 kilo u Heroine No 4 bad 3,32,308 tylli ki kuli jong u Meth-Amphetamine kiba shong dor T. 123.49 klur bad ki song jong kine ki drok ki shong dor T. 8.18 klur. Ha kaba da kine baroh ka jingdon jong u drok ba la ïoh ban kurup ka la long da T. 130 klur, kynthup ka jingïoh ban kurup ïa ki mrad kiba la jan duhjait naduh u Kyllalyngkot jong une u snem 2024,” la ïathuh ka tyllong khubor.
Kumba la ong ka jingthoh kaba la wan na ka tnat shipai Assam Rifles la ong ba la ïoh ban kurup ïa u drok uba don ka jingkhia da kumba 480 grams uba la kot sha ka T. 3.36 klur bad ïohkem ruh ïa uwei u briew ha ka thaiñ Crossing Point-I, Zokhawthar Champhai district, kaba don ha Mizoram ha ka 14 tarik, Rymphang.
Ïa une u briew uba la shahkem ha kane ka kam khaïi drok la aiti sha ki pulit.
“Ïa ka jingpyntreikam la pynlong ha ryngkat ka jingïatreilang jong ki shipai ka tnat Assam Rifles bad ki nongmihkhmat jong ka kynhun ka tnat pulit ha Zokhawthar hadien ba la ïoh jingtip halor ka jingdon jong ki jingjia ba don ki nongkhaïi drok. Ki song jong u Heroin No -4 bad ki briew kiba la shahkem ha kine ki jingjia la aiti sha ki pulit jong ka tnat Zokhawthar na ka bynta ban bteng ïa ki jingpyntreikam bad ban tohkit ïa ki,” la ong ka jingthoh. “Ka jingdon jong ki kam khaïi drok ka la buh jingma shibun bad buh ka jingsngew khia na ka bynta ka jylla Mizoram bad ka ri India,” la ong shuh shuh ka jingthoh.
