Chennai, Rymphang:
Ka National Agricultural Cooperative Marketing Federation of India (NAFED) kaba treikam hapoh ka Ministry of Agriculture, bad ka National Cooperative Consumers’ Federation of India (NCCF) kaba treikam hapoh ka Ministry of Food and Consumer Affairs, da ka jingïasnohktilang ki la pynlong ïa ka jingdie ïa u khaw jong ka Bharat Rice ha kaba la pyndonkam da ki Van.
Kine ki Van ki ju tyrwa ïa ki song jong u khaw ba 5 kilo bad 10 kilo sha ki nongthied ha ka dor T. 29 shi kilo. Katba ka sorkar kmie ka dang don bynta ban ïakhun halor ka jingbuhdor ïa u khaw bad ban ai jingmyntoi sha ki paidbah, ka tyllong khubor kaba la wan na ka Food Industry ka la ong ba ka skhim kan sa ai jingmyntoi sha ki nongthied tang lada ka jinglong jong u khaw Bharat Rice u ïahap bad u khaw Ponni Rice ba la die ha ki dukan dielang.
Kumba la ïathuh ka tyllong khubor kaba la wan na ki heh ba dei khmih, la ong ba la don baroh kumba 22,000 Metric tons (MT) u khaw ba la mang na ka bynta ka Tamil Nadu, ha kaba 10,000 MT la dei ban die da ka NCCF.
“Ngi la mang ar tylli ki Van, kawei hajan ka shlem treikam jong ka NCCF ha Thousand Light bad kawei pat ha Anna Nagar. Ki briew ki lah ban thied ar song u khaw ha ka dor T. 29 shi kilo, ha kaba la mang ba ar ne lai song kan long na ka bynta shi khlieh briew,” la ong ki heh sorkar.
Ki heh sorkar ki la ong ba ka Agency ka la dep ban die lypa ïa u “Bharat atta” ha ka dor T. 27.5 shi kilo bad u “Bharat Chana dal” ha ka dor T. 60 shi kilo.
“Ka jingthmu jong ngi ka long ban nang pynïar shuh shuh ïa ka jingpyntreikam sha ki 25 haduh 26 tylli ki distrik kiba don ha kylleng ka jylla,” la bynrap u heh sorkar.
