Shillong, Rymphang 18
U Myntri Sorkar Pdeng ba dei khmih ïa ka tnat Youth Affairs and Sports, u Anurag Singh Thakur un wan ïashim bynta ha ka prokram ban plie ïa ka Khelo India University Games 2023 ha ka Lah Sngi U Ble ha nongbah Guwahati.
Ha kane ka lympung yn pynlong ïa ki jingïaleh -kai bapher bapher ha baroh ki hynñiew tylli ki jylla ka thaiñ shatei lammihngi bad yn pynkut ha ka 29 tarik mynta u bnai. U nongrwai bad nongthaw jingrwai ba pawnam, u Paponun un ai ki sur jing-rwai ha Sarusajai Sports Complex, Guwahati.
U Anurag un ïadon bynta ha kane ka jingplie ryngkat u Myntri Rang-bah ka jylla Assam, u Himata Biswa Sarma. U Myntri Rangbah Duh, Narendra Modiun ai mynsiem ïa ki nongïaleh-kai lyngba ka ‘video message’. Kane ka dei ka bynta kaba saw jong kane ka lympung ialehkai ha kaba kin don haduh 4500 ngut ki nongïalehkai na 200 tylli ki skulbah jong ka ri.
Ka Myntri ka tnat sports and youth welfare jong ka jylla Assam, ka Nandita Garlosa ka la ong ba ka jingïashim bynta u Papon kan pynphuh pynphieng ïa kane ka prokram ban plie ïa kane ka lympung ïalehkai. “U Papon u dei uba paw nam bha bad ki samla jong ka India bad ka Guwahati kin ïohsngew ïa u. Ngi la don ki briew kiba tbit bha ha ka put ka tem bad ki sur jingrwai kum u Bhupen Hazarika, hynrei ka jingrwai kaba sngewtynnad kam kheiñ ïa ka rta. U Hazarika bad u Papon ki don la ki jong ki jinglong kyrpang bad hangne ngim dei ban klet ïa u Zubeen Garg,” la ong ka Garlosa.
Kane ka jingplie ïa kane ka lympung ïalehkai kan pdiang ïa ki nongwan khlem kano kano ka jingshim pisa bad kan pyni ruh ïa ka jingngeit ha ka jingïatylli, ka jingïapher bad ka rukom ïalehkai kaba burom lang ïa baroh. Shuh shuh, yn pyni ïa ka deiriti jong ka Assam lyngba ki jingsaiñdur tynrai ka ban pynkhlaiñ shuh shuh ïa ka jingpyni ïa ka deiriti ha kane ka prokram.
Lah ban shu kdew hangne ba ka Khelo India University Games ka la sdang ha ka sngi Saitjaiñ lyngba ki jingïalehkai kabaddi ha ka Sarusajai Stadium. Phra tylli ki kynhun ki dang ïakhun ban long ki lahduh.
Ka KIUG ka long shi bynta jong ka sien jam Khelo India jong ka Sorkar India ïa kaba la sdang ha u snem 2016. Ka Khelo India Mission ka peit bniah ïa ka jingkyntiew ïa ki kam ïalehkai ha ka imlang sahlang bad ka jinglap ïa ki nongïalehkai ba don sap na kylleng ka ri.
